له لوږې سره د مخامخو کسانو د شمیر د زیاتیدو په هکله خبرداری
۱۳۹۹ اسفند ۲۲, جمعه
ګویترش د پنجشنبې په ورځ (د ۲۰۲۱م کال د مارچ ۱۱مه) د ملګرو ملتونو امنیت شورا ته وویل چې د سملاسي اقداماتو پرته په نړیواله کچه په میلیونونو انسانان «لوږه او مرګ» ګواښي.
هغه د دې علتونه د اقلیم بدلون او د کرونا وبا یاد کړل. د ګویترش د معلوماتو له مخې په شا او خوا ۳۰ هیوادونو کې څه د پاسه ۳۰ میلیونونه انسانان د لوږې له خطر سره مخامخ دي.
ګویترش د امریکا متحده ایالاتو له لوري رابلل شوې ځانګړې غونډې ته په وینا کې وویل چې د ده پیغام روښانه دی: که چیرې انسانانو ته خواړه برابر نه شي، شخړې به غښتلې شي. هغه زیاته کړه چې «قحطي او لوږه نور د خوارکي موادو د نیمګړتیا موضوع نه ده. د هغې لویه برخه اوس د انسانانو له لوري برابریږي.» د هغه په خبره په ۲۰۲۱م کال کې د لوږې د ګواښ مخنیوی کیدی شي.
ګویترش یادونه وکړه چې د تیر میلادي کال تر پایه پورې په نړۍ کې تر ۸۸ میلیونه انسانان «د شخړو او بې ثباتۍ» له کبله له سختې لوږې سره مخامخ شوي دي او دا د یوه کال په موده کې ۲۰ سلنه زیاتوالی ښيې.
د هغه په خبره سږ کال د دې کچې د لا زیاتیدو اټکل کیدی شي. ګویترش په ځانګړې ډول د ساحل زون، د افریقا ښکر، سویلي سوډان یمن او په افغانستان کې وضعیت ته اشاره وکړه. هغه د دې وضعیت پر وړاندې د مقابلې له پاره د ۵،۵ میلیارده ډالرو سملاسي مرستې پر اړتیا ټینګار وکړ.
زموږ له آرشیف څخه: