آلمان: دوه تنکي ځوانان پر کرسمس بازار د برید په طرح تورن شول
۱۴۰۲ آذر ۱۰, جمعه
یو ۱۵ کلن ځوان د سې شنبې په ورځ کلن ته څېرمه په بورشاید ښار کې ونېول شو او د چهارشنبې په ورځ په لیورکوزن کې یوې څارنوالۍ پرېکړه وکړه چې هغه به د جرم تر ثابتېدو په توقیف کې پاتې شي. یو بل ځوان دآلمان په ختیځ براندنبورګ ایالات کې له هغه سره د لاس لرلو په ګومان ونېول شو.
چارواکي وايي چې دغه ۱۵ کلن ځوان په یو چټ ګروپ کې ددغه برید په اړه خپله طرحه لېکلې ده. په دوسلدورف کې د پنجشنبې په ورځ څارنوالانو ویلي دي چې دغه ځوان تورن دی چې ټاکل شوې وه د ډسمبر په لومړی نېټه د نوردراین وستفالن ایالات په لورکوزن ښار کې د کرسمس پر یوه بازار برید وکړي. د څارنوالانو په خبره هغوی غوښتل چې یوې کوچنۍ لارۍ ته چاودنه ورکړي.
د څارنوالانو د ویناپاڼې پر بنسټ، ۱۵ کلن ځوان ادعا کړې ده چې د دغه برید له پاره یې بنزین ترلاسه کړي ول. د څارانوالانو په وینا دغو دوو شکمنو هوډ درلود چې تر دغه برید وروسته به آلمان پرېږدي او د داعش يا «اسلامي دولت» نومې ترهګري ډلې له خراسان څانګې سره چې په افغانستان او شاوخوا سیمو کې فعاله ده یو ځای کیږي.
څارنوالانو ویلي دي چې څېړونکي د دغه ۱۵ کلن ځوان په کور کې د موندل شویو شواهدو د ارزونې په حال کې دي، خو د بنزینو هیڅ ډول زیرمه یې نه ده موندلې. دغه ځوان د وژنې او د تاوتریخوالي د یو اقدام په شک تر څېړنو لاندې دی.
د آلمان د «تاکس شاو» خبري خپرونې خبر ورکړی دی چې اصلي تورن ۱۵ کلن ځوان آفغان – آلمانی دی.
د آلمان د کورنیو استخباراتو آژانس د نېولو د دغه خبر تر خپرېدو وړاندې د چهارشنبې په ورځ وویل چې د اکتوبر پر ۷مه نېټه د اسرائیل پر سویل د حماس ترهګرو تر برید وروسته په دغه هېواد کې د برېدونو ګواښونه ډېر شوي دي.
دغه آژانس د انفرادي برېدګرو د افراطي کېدو خطر ته اشاره کړې ده چې د برید له پاره له ساده وسایلو «نرمو اهدافو» څخه کار اخلي. د آلمان کورنیو استخباراتو زیاته کړې ده چې «واقعي خطر تر هغه لوړ دی چې له مودو راهیسې شته.»