رپوټ: قطر آلمان ته د افغان مهاجرو د اخراج سهولت برابر کړی وو

قطري تلویزیوني شبکې الجزيرې د شنبې په ورځ خبر ورکړ چې قطر له آلمانه افغانستان ته د ۲۸ افغان مهاجرو د اخراج په مسئله کې د آلمان حکومت او طالبانو تر منځ مذاکراتو زمینه برابره کړې ده.

یادې رسنۍ د قطر د بهرنیو چارو وزارت د ېوې منبع له قوله ویلي چې «د قطر رول د آلمان د غوښتنې مطابق ادا شوی تر څو افغانان د خپلو قانوني شرایطو مطابق خپل هېواد ته اخراج شي.»

د جمعې په ورځ  (د ۲۰۲۴م کال د اګست ۳۰مه) ۲۸ افغان مهاجر چې په آلمان کې د جرمونو مرتکب ګرځېدلي ول، د لیبزیک له هوايي ډګره د قطر هوايي شرکت په يوه الوتکه افغانستان ته اخراج شول.

آلمان پر افغانستان حاکمو طالبانو سره ديپلوماتيکي اړيکي نه لري چې پرې د بشري حقونو په ځانګړې توګه د ښځو او نجونو د حقونو د نقضولو تورنه دي.

قطرۍ سرچېنې ويلي دي: «د قطر رول د افغانانو خپل نهايي مقصدځای ته د رسېدلو له پاره، د دواړو لورو تر منځ د پیغامونو تبادله کول وو.»

یوې سرچينې د نوم د نه ښودلو په شرط ويلي دي چې د قطر منځګړيتوب د دوحه د رول یوه برخه ده کوم چې د طالبانو او نړېوالې ټولنې تر منځ ېې ارتباطي سهولت ایجاد کړی دی. طالبان په قطر کې سیاسي دفتر لري او ډېری ديپلوماتيکي اړيکې له هماغه ځایه نیسي. قطر د منځني ختيځ په کړکيچ کې هم له نړېوالو سره منځګړيتوب کوي.

دا په تېرو درو کلونو کې چې طالبان پر افغانستان واکمن دي، له آلمانه افغانستان ته د افغان مهاجرو د اخراج لومړۍ جوپه ده.

د طالبانو د کډوالو او بېرته ستنېدونکو وزارت معین، عبدالرحمن راشد، د جمعې په ورځ دویچه وله ته وويل: «موږ هم د رسنیو له طریقه خبر شولو.»

راشد زیاته کړه: «موږ قطر ته د مهاجرو له انتقاله خبر نه وو، خو پرون مو د اروپايي ټولنې استازی دلته وزارت ته رابللی وو او له هغه مو وغوښتل چې آلمان اړ کړي چې امارت سره یوه ناسته ولري او په دې هکله یو میکانیزم جوړ شي تر څو د دې معلومات وشي چې دغه افراد چې اخراجیږي څه جرمونه ېی کړي دي.»

د طالبانو د حکومت دغه چارواکي زیاته کړه چې که چېرته دغه افغانان درانه جرمونه نه لري آلمان دي ورته اجازه ورکړي چې په خپله خوښه افغانستان ته بېرته ستانه شي.
(dpa / dw dari)/mks/aa

له آرشیف څخه: