د آلمان د اورګاډو شبکو انترنيتي پوښښ ۹۹ سلنې ته پورته شوی
۱۴۰۳ مهر ۱۲, پنجشنبه
د آلمان د اورګاډو ملي شرکت دويچه بهان (DB) او ستر مخابراتي شرکت دويچه تیلکام وايي چې د آلمان د اورګاډو انترسيټي ايکسپریس (ICE) او انترسیتي (IC) شبکې اوس پر ۹۹ سلنه چټک انترنتي خدماتو سمبال شوي دي. دا دواړه د آلمان د اورګاډو چټک سرعت درلودونکې مهمې شبکې دي.
دويچه بهان او دويچه تيلکام وايي چې د اورګاډو په دغو شبکو کې د انترنيټ سرعت لږ تر لږه په ثانیه کې ۲۰۰ ميګابايټ دی چې په ۲۰۲۱م کې د دوی ترمنځ د شراکت له پيلېدو راهيسې ۱۲ سلنه لوړ شوی دی.
زیاته شوې چې د دغه شراکت په ترڅ کې دويچه بهان د ګرځنده انټونونو له پاره ځمکه او د نوري فایبر د اتصال سهولتونه ایجاد کړي دي.
دويچه بهان او دويچه ټيلګام وايي دواړو شرکتونو په سلونو ميلیونه یورو لګولي ترڅو د مهمو لارو په اوږدو کې د «تقریباً دوامداره» ټيلفوني اړیکو خدمات او انترنيتي پوښښ برقراره وي.
د دويچه بهان اجرايوي مشر ريچارد لوتڅ، وويل چې د دواړو شرکتونو ترمنځ همکاري ښودلې چې آلمان د ډيجيتلایزیشن په بهیر کې مخکښ دی.
د آلمان خبري آژانس په حواله، د تیلکام علاوه ودافون شرکت هم د خپلو فعالیتونو د پراختیا په موخه په ۲۰۲۲ کې له دویچه بهان سره شریک شو.
اوس مهال تيلکام شرکت د مهمو لارو په اوږدو کې ۹۵ سلنه انترنيتي پوښښ لري چې سرعت ېې په ثانیه کې ۳۰۰ میګابايټه یا تر دې هم زیات دی. سيال شرکت ودافون بیا ۸۳ سلنه پوښښ لري او د انترنیت سرعت ېې لږ تر لږه ۲۲۵ میګابایټه په ثانیه کې دی.
تيلفونيکا (O2) بل مخابراتي شرکت دی چې په آلمان کې فعالیت کوي. دغه شرکت په خپلو خدماتو کې د ودې مقایسوي ارقام نه دي په ډاګه کړي.
د دغو شرکتونو په خبره، دوی ټولو د فدرالي شبکې آژانس ټولې هغه اړتیاوې برابرې کړي چې وشي کړی د لویو لارو په اوږدو کې په ثانیه کې د ۱۰۰ ميګابايټه ثابت خدمات موجود وي.
(dpa)mks/nz
له آرشیف څخه: