بلخ کې سېلابونو درې سوه کورونه نړولي دي
۱۴۰۲ فروردین ۴, جمعه
د بلخ له پاره د طالبانو د امنیې قومندانۍ ویاند محمد اصف وزیري دویچه ویله ته وویل، دغه سېلابونه د یاد ولایت زارع ولسوالۍ کې راغلي، چې تر اوسه یې د انساني تلفاتو په اړه مالومات نه شته.
دی وايي:«تر درې سوو کورونه اوبو لاندې کړي. متاسفانه انساني تلفات لري؛ خو دا چې اوس هم هلته سېلابونه شته او ختم نه دي نو د تلفاتو مالومول یو څه وخت غواړي.»
محمد اصف وزیري وايي، د دوی د حکومت امنیتي ځواکونه او مرستندوی ډلګۍ زارع ولسوالۍ ته د مرستې له پاره رسېدلي دي. نوموړی وایي، د دغو سېلابونو له امله د شاوخوا درې زره جریبه کرنیزې ځمکې د تخريب کيدو او زیانمنولو سربېره ګڼ شمېر څاروي هم مړه شوي دي.
طالبان: د اقلیم بدلون دوه میلیارده ډالره زیان اړولی دی
دا سېلابونه داسې حال کې راوځي، چې همدا تېره ورځ د افغانستان د هوا پېژندنې ادارې په شلو ولایتونو کې د سختو اورښتونو وړاندوينه کړې ده.