Штрајк во Самсунг на неодредено време

Штрајкот на вработените во јужнокорејскиот технолошки гигант Самсунг Електроникс ќе продолжи на неодредено време, соопшти синдикатот. Националниот синдикат на Самсунг Електроникс (НСЕУ), кој со околу 30.000 членови зборува во име на речиси четвртина одработниците во компанијата, ваквата своја одлука ја оправда со неподготвеноста на раководството да разговара.

Според компанијата, тридневниот штрајк во јужнокорејскиот технолошки гигант кој започна во понеделникот (8.07) нема последици по работниот процес. „Нема прекин во производството“, ги цитираа локалните медиуми претставниците на компанијата.

Самсунг, меѓу другото, произведува и висококвалитетни мемориски чипови кои се важни за глобалната економија. Високата претставничка на синдикатот, Парк Сеол, се спротивстави на изјавите на компанијата и рече дека поизводството е погодено. Вработените штрајкуваат со барање за повисоки плати. „Но, она што е поважно е дека компанијата треба да разбере оти не се работи само за тоа“, изјави Парк Сеол за АФП. „Сакаме да го слушнат нашиот глас и да сфатат колку сме очајни“.

Преговорите на синдикатот и раководството на Самсунг траат од јануари. Двете страни досега не успеаја да ги премостат разликите. Синдикатот ја одби понудата на компанијата за зголемување на платите за 5,1 отсто. Синдикалците инсистираат и на подобрување во делот на годишниот одмор и транспарентноста на бонусите поврзани со работниот учинок.