Zaben tsakiyar wa'adi a kasar Amirka
November 7, 2022
A wannan zaben akan zabi dukkan 'yan majalisar wakilai, da kashi daya bisa uku na majalisar dattawa da kuma mukaman shugabancin jihohi da dama. Shekaru hudu baya a zaben tsakiyar wa'adi karkashin tsohon Shugaba Donald Trump, adadin alkaluma ya karu zuwa kashi 53.4 cikin dari.
A bana dai Amirka kasa ce mai daukar hankali a kan siyasar cikin gida. Martanin da kotun kolin kasar ta yi na soke dokar hana zubar da ciki, wanda ya tabbatar da 'yancin zubar da ciki a fadin kasar wata alama ce da ke nuna cewa siyasar kasar na da matukar bambanci tsakanin jam'iyyu da shugabanni. Masu sassaucin ra'ayi sun firgita da abin da suke gani a matsayin wani hakki na asali da aka kwace. Yayin da su kuwa masu ra'ayin mazan jiya suka yi murna da hukuncin a matsayin babbar nasara.
Abin kallo dai a wannan zaben shi ne makomar tsohon shugaban kasar Donald Trump. Ko magoya bayansa na iya samun nasara a banagaren sanatoci da majalisar wakilai da kuma a jihohi domin in hakan ya faru siyasar za ta shiga wani sabon babi, kamar yadda Jessica Taylor, 'yar jarida da ta kware a fannin majalisar Dattawa da gwamnoni ta fada.
A yanzu haka dai akwai 'yan takara da dama da ba su amince da halaccin gwamnatin Amirka mai ci ba, wadanda suke neman mukamai daban-daban. Lamarin da masana ke cewa shi ne yake kara kawo babban tunani a wannan zaben rabin wa'adi na Amirka. A bangaren sa shi ma Shugaba Joe Biden, wannan zaben shi ne babbar manuniyar karbuwarsa ga kasar ta Amirka.