Za a koma teburin neman tsagaita wuta a Gaza

Jami'ai da dama da ke nazari a kan yakin watanni tara da Isra'ila ta kaddamar a kan Zirin Gaza, na ganin girman asarar da aka tafka na iya sanya kungiyar Hamas ta sassauta wasu bukatunta ta yadda za a kai ga cimma matsaya.

Ko a karshen mako ma dai kungiyar ta Hamas ta jingine guda daga cikin manyan bukatunta na cewa sai Isra'ila ta dakatar da yakin kafin ta amince da tattaunawa a kan tsagaita bude wa juna wutar.

Ofishin Firaministan Isra'ila Benjamin Netanyahu, ya sanar da cewa wakilan kasar za su koma teburin tattaunawar birnin Doha na kasar Qatar.