Chadi: 'Yan bindiga sun halaka mutane

Rundunar sojojin kasar Chadin ce ta tabbatar da hakan, inda ta ce lamarin ya afku ne a daidai lokacin da Chadin ta sanar da cewa za ta hada gwiwa da makwabciyar kasar Jamhuriyar Afirka ta Tsakiya domin magance matsalar masu dauke da makamai. 'Yan binidga masu satar shanun sun farmaki kauyen Mankade da ke gundumar Laramanaye, tare da halaka mutane sama da 10 suka kuma yi awon gaba da shanunsu. Ministan tsaron kasar Daoud Yaya Ibrahim da ya tabbatar da afkuwar lamarin ya shaidawa kamfanin dillancin labaran Faransa na AFP cewa, jami'an tsaro sun bi sawunsu tare da halaka bakwai a cikinsu. Ya kara da cewa sun kuma cafke barayin takwas, tare da kwato shanun da suka sace.