'Yan kallon zabe za su je Venezuela

Kasar Venezuelan ce dai ta bukaci Majalisar Dinkin Duniyar ta aike da tawagar. Sai dai sabanin yadda ta saba a wannan karon, tawagar kwararrun zaben za ta sa ido ne kawai kafin daga bisani ta gabatar da cikakken rahoton yadda ya wakana. Ita ma dai kungiyar Tarayyar Turai ta ce ta cimma wata yarjejeniya da Venezuela domin tura tawagar masu sanya ido a zaben, wanda ke zama tamkar wani zakaran gwajin dafi biyo bayan amincewar da jam'iyyun adawa suka yi  na shiga a dama da su a wannan karo sabanin yadda suka yi ta biris da zabukan da suka gabata na shekarar 2018 da na 'yan majalisun dokokin kasar na shekarar da tagabata.