Taron ƙasashen duniya akan Siriya

Wannan kira na Amurka na zuwa ne a daidai lokacin da wakilan ƙasashen sama da 100 na Turai da larabawa dake kiransu kansu "abokan Siriya, ke gudanar da wani taro a birnin Paris. Duk da rahotannin dake nuni da cewar wajen mutane dubu 16,500 ne rayukansu ya salwanta a rigingimun watanni 16 na Siriyan, abokananta Rasha da China basa halartan taron na birnin Paris, duk kuwa da alamun sauyin alkiblar Moscow akan rikicin. Taron na yau dai na zuwa ne bayan waɗanda aka gudanar a biranen Tunis da Istambul, inda kira dangane da ɗaukar matakai masu tsauri kan gwamnatin Bashar al-assad ya ci tura. China dai bata halarci dukkan tarurrukan na baya ba, wanda ya samu halartar ƙasashen Amurka, Britaniya, Faransa, Jamus da kasashen larabawa akarkashin jagorancin saudi Arabiya da Qatar. Akan hanyarta zuwa birnin na Paris, sakatariyar harkokin wajen Amurka Hillary Clinton ta ce lokaci yayi da za'ayi haɗin kai a gaban komitin sulhu, domin ɗaukar matakin matsin lamba akan shugaba Assad.

Mawallafiya: Zainab Mohammed Abubakar
Edita : Yahouza Sadissou Madobi