Taron 'yan jarida na duniya na DW

Taron na bana dai ya kasance karo na takwas da tashar ta DW ke shiryawa, kuma a wannan karon ya karbi bakuncin kimanin mutane 2,000 daga sassa dabam-dabam na duniya da suka hadar da 'yan jaridu da masu fafutuka. Tashar ta DW dai kan shiyar wannan taron ne, domin tattauna matsaloli kan halin da duniya ke ciki da kuma lalubo mafita. Makomar aikin jarida da kuma matasa, na cikin abin da ya dau hankali a kololuwar taron na bana.

Batun yadda ake kallon labaran da suka shafi sauyin yanayi a ciki da wajen dakin labarai a duniya da bayar da rahotanni kai tsaye a fagen daga da kuma batun mata a fasahar aikin jarida da na fasalta aikin jarida a zamani na gaba ma dai, na daga cikin manyan batutuwan da taron ya mayar da hankali. Akwai kuma batun kalubale a fannin aikin kirkira a Afirka  da sashen al'adu na DW ya jagoranta, wanda shi ma ya yi matukar daukar hankali. Batun yakin da ake fafatawa tsakanin rasha da Ukraine ma ba a barshi a baya ba, domin kuwa an tattauna a kansa.