Siriya ta dauki alhakin faduwar jirgin Turkiyya

Siriya ta bada tabbacin cewa, ita ce ta kabo jirgin saman yakin Turkiya da ya ketara sararin samaniyar yankinta ran juma'a, abun da ya janyo wani sabon rikici tsakanin kasashen biyu. Frime Ministan Turkiyya Rajeb Tayyib Erdowan ya ce kasarsa zata sanar da matsayinta nan ba da dadewa ba, ta kuma dauki duk matakan da suka dace da zarrar aka kammla fayyace wannan batu.

Wani mai magana da yawun dakarun sojin Siriya ya fadawa kamfanin dillancin labarun kasar na SANA cewa jirgin ya bude wuta ne kan wasu wadanda ba'a riga an gano ko su wanene ba, da shigarsa yankin Siriyar. Majalisar Dinkin Duniya dai tana sanya ido kan wannan rikici.

To sai dai wannan na zuwa ne bayan da wasu 'yan uwa hudu biyu a rundunar sojin Siriyar, daga cikin su masu rike da mukamin birgadiya Janar da kuma Kanar biyu suka sanar da cewa sun canza sheka a wani faifayin bidiyon da suka wallafa a yanar gizo.

Mawallafiya: Pinado Abdu Waba
Edita: Halima Balaraba Abbas