EU ta samar da riga-kafin kyandar biri

Kamfanin sarrafa magunguna na kasar Denmak mai suna Imvanex Bavarian Nordic ya tabbatar da cewa, a yanzu za a iya amfani da allurar riga-kafin agana ta kamfanin wato Imvanex a kasashen Tarayyar Turai EU domin magance cutar kyandar birin da dangoginta. Wannan dai na zuwa ne, bayan kasashen Kanada da Amirka sun bayyana amincewarsu da allurar riga-kafin aganar a matsayin ta kyandar birin. A karshen mako ne dai, Hukumar Lafiya ta Duniya WHO, ta ayyana cutar a matsayin wadda ke bukatar daukin gaggawa a duniya. Tuni dai cutar kyandar birin ta zama gama-gari a kasashen yammaci da tsakiyar Afirka, kafin daga bisani ta fara bazuwa a duniya cikin watan Mayun wannan shekara. Hukumar ta WHO ta tabbatar da cewa, sama da mutane dubu 15 da 300 ne suka kamu da cutar a kasashe 75 tun bayan bullar ta kana ta fi karfi a kasashen nahiyar Turai.