Rasha da China sun toshe ƙudirin Kwamitin Sulhu a kan Siriya

Ƙasashen Rasha da China sun toshe ƙudirin Kwamitin Sulhun Majalisar Ɗinkin Duniya kan ƙasar Siriya. Yayin da dakarun gwamnatin Siriya suka matsa ƙaimin kawar da 'yan tawaye cikin yankunan Damascus babban birnin ƙasar, bayan harin ƙunar baƙin wake da ya kai ga mutuwan wasu manyan jami'an gwamnati.

Wannan ƙudiri da zai ƙaƙaba takunkumi ga gwamnatin shugaba Bashar al-Assad. Jakadan Faransa a majalisar Gerard Araud ya shaida wa Kwamitin Sulhun cewa daƙile ƙudirin, ya zama hana mai shiga tsakani na ƙasashen duniya Kofi Annan matsin lamba da ya buƙata wajen warware rikicin.

Rashin sanin wurin da shugaba Assad yake

Ya zuwa yanzu babu bayanan inda shugaban ƙasar ta Siriya Bashar al-Assad, matarsa da 'ya'yansa uku, suke tun bayan harin ranar Laraba da ya hallaka manyan jami'an gwamnati da suka haɗa da ministan tsaro da mataimakinsa, wanda siriki ne ga shugaba Assad. Jami'an gwamnatin sun ce har kawo yanzu Assad yana fadar shugaban ƙasa inda yake ci gaba da jan ragamar mulki, amma 'yan adawa da majiyoyin diplomasiya sun ce ya yi ƙaura zuwa garin Letakia mai tashar jiragen ruwa.

Yayin da faɗa a kewayen birnin Damascus ya shiga kwanaki na biyar, mutane suna ci gaba da gudu daga birnin, jagoran sa ido na Majalisar Ɗinkin Duniya, Janar Robert Mood ya yi kakkausar suka kan harin, inda ya bayyana cewa ƙasar ba ta kan hanyar samun zaman lafiya. Wannan daidai lokacin da faɗa ya ƙara ƙazancewa tsakanin dakarun gwamnati da mayaƙan 'yan tawaye a kewayen gine ginen gwamnati.

Yayin da ƙananan makamai ke ci gaba da wargaza lamura cikin ƙasar ta Siriya, tun da fari kafin jefa ƙuri'ar, babban sakataren Majalisar Ɗinkin Duniya Ban Ki-moon, wanda ya ziyarci ƙasar China, ya bayyana mahimmacin goyon baya daga ƙasar, kan matakan da Kwamitin Sulhu ke neman ɗauka na daƙile cikin dake ci gaba da bazuwar rikicin dake awun gaba da rayuka:

Buƙatar ɗaukar tsauraran matakai

"China za ta taka mahimmiyar rawa, wannan yana cikin dalilan da suka saka nake nan, nayi ƙoƙarin tattauna haka da shugabannin China, Shugaba Hu Jintao da ministan harkokin waje da sauran jami'ai, Kwamitin Sulhu ya ɗauki wasu matakai, amma akwai tsananin buri mai yawa, na cewa Kwamitin Sulhu ya haɗa kai, domin ɗaukar matakin ba sani ba sabo, domin shawo kan zubar da jinin."

Ban Ki-moon ya ƙara da cewa tilas Kwamitin ya ɗauki matakin na bai daya da zaiyi aiki, domin kawo ƙarshen abunda ke faruwa. Amma babu alamu wannan ziyara ta Ban zuwa birnin Beijing za ta sauya matsayin ƙasar kan abunda ke faruwa.

Harin ranar Laraba ya janyo wa Kwamitin Sulhun Majalisar Ɗinkin Duniya tsaiko kan ƙudirin da yake neman ɗauka kan matakan shawo rikicin ƙasar ta Siriya, ƙudirin dake samun goyon bayan ƙasashen yammacin duniya, kuma yanzu dai Rasha da China sun toshe wannan ƙudiri, wanda ba shi ne karon farko da suka yi haka ba.

Mawallafi: Suleiman Babayo
Edita: Mohammad Nasiru Awal