Kawancen Saudiyya ya tsagaita wuta a rikicin Yemen

Kawancen kasashen da Saudiyya ke jagoranta a yakin da suke yi da mayakan Houthi na kasar Yemen ya sanar da cewa zai tsagaita. Matakin ya biyo bayan rokon da MDD ta yi cewa bangarori biyun su dakatar da barin wuta albarkacin zuwan azumin watan Ramadana. 

A cikin wata sanarwa da mai magana da yawun kawancen Saudiyyar Turki al-Maliki ya fitar, ya ce za su yi duk mai yiwuwa wurin ganin tsagaita wutar da ake sa ran za ta fara aiki a ranar Asabar ta wannan mako ta yi nasara.

Tun daga shekara ta 2015 ne dai mayakan Houthi da Iran ke goya wa baya a rikicin Yemen ke musayar wuta da kawancen Saudiyya da ke samun goyon bayan hukumomin Riyadh, lamarin da ya tilasta wa dubban mutanen Yemen kaurace wa gidajensu.