Nijar ta ce yankin iyakar ta da Burkina Faso na ta ne
October 17, 2012
Jamhuriyar Nijar da Burkina Faso na jayeyya ne akan iyakar da ke tsakaninsu, wadda turawan mulkin mallaka na kasar Faransa suka shata tun 1927. Kasashen biyu sun kasa samun daidaito iyakar ta su bayan da suka samu 'yancin kaai daga Turawan da suka yi musu mulkin mallaka. Duk wani yunkurin da suka yi ta yi domin magance matsalar tsakaninsu ya ci tura. Saboda suka shigar da kara gaban kotun duniya domin ta warware wannan rigimar dake tsakanin su.
Nijar ta dogara akan tarihi domin kare matsayinta a kotun birnin Hague
Ministan harkokin wajen Nijar Mohamed Bazu, shi ya jagorancin tawagar kasarsa a akotuin da ke birnin Hague na Holland. Ya ce "akwai garuruwa da yawa wanda kasar Burkina Faso ta ce na ta ne. Amma suka ce ba daidai ba ne a raba gari ko gunduma biyu. Alhali tun lokacin turawan da suka yi wa kasashen biyu mulkin mallaka ba su taba raba gari ko gunduma biyu."
Shi ma dan majalisar dokokin Nijar Alhaji Mamman Sani na Malam Rabi'u, wanda kuma tsohon dan jarida ne, ya ce da ma ba abin mamaki ba ne idan kasarsa ta nemi a warware rikicin cikin ruwan sanyi. "Nijar ba kasa ce mai goyon bayan fitintunu ba ko jayaiya da za ta sa ana ta takun saka da wata kasa makwabciya ba. Wancan nasarar da Niger ta samu a shari'a da aka yi da kasar Benin, gasikya ne ya saya." Fatan sa shi ne wadanda ke nauyin yin shari'ar su yi aiki yadda dokoki suka tanada.
Burkina Faso ta zargi NIjar ta saba yarjejeniyar da suka cimma tsakaninsu
A yayin da tawagar kasar Burkina Faso ta ke ba da bahasi a kotun duniya, ta zargi hukumomin kasar NIjar da kin mutunta sharuddan da aka rattaba musu hannu akai. Lamarin da minista Bazum ya ce akwai dalili. "Lalle jami'an Nijar sun so su amince da wata yarjejeniya amma daga baya suka ga ba za su yarda da ita ba. Tun lokacin da aka yi wannan aikin Nijar ta aika da kwararun masana kasar Faransa da Senegal suka binciko tarihi da turawan mulkin mallaka suka adana."
Sai dai kuma Nijar ta amince da shata iyakar ta da Burkina Faso ta bangaren Arewa da can Kudu: Majalisar dokoki kasra ma ta albarkanci wadannan sabbin sharuddan. Babban abin da mutane ke jira a nan shi ne ko talakawan da ke kan iyakar kasashen biyu za su rungumi kaddara.
Mawallafi: Mahaman Kanta
Edita: Mouhamadou Awal