Ministan harkokin wajen Gabon ya mutu

Fadar gwamnatin Gabon ta sanar da mutuwar ministan harkokin wajen kasar Michael Moussa Adamo, sanarwar gwamnatin ta ce, Moussa ya mutu ne a sakamakon ciwon bugun zuciya da ya riske shi a yayin da ake shirin zaman majalisa a wannan Jumma'ar.

 Ministan dan shekaru sittin da biyu da haihuwa, ya kasance makusancin shugaban kasar Ali Bongo Ondimba da ya kwashi shekara da shekaru yana mulkin kasar da ke tsakiyar Afirka. Shugaba Bongo ya baiyana shi a matsayin amininsa yana mai cewa, kasar ta yi rashin dan kasa mai kishin al'ummar. Kafin mutuwarsa dai, Moussa Adamo ya taba rike mukamin ministan tsaron kasar da kuma jakadan Gabon a kasar Amirka.