Martanin Jamus akan Rasha da China

Bayan da a ƙarshen makon da ya gabata, ƙasashen Rasha da China, suka ɗare kan kujerar na ƙi domin hana wanzar da wani ƙudurin kwamitin sulhu na majalisar ɗinkin ɗuniya akan ƙasar Siriya, jami'an siyasa a birnin Berlin suka fara bayyana takaicinsu game da lamarin. Sai dai kuma har yau ana fatan samun sauyin salon tunani, aƙalla daga ɓangaren ƙasar Rasha. Jamus da Faransa suna fatan cewar ƙungiyar tuntuɓar junan da aka naɗa zata cimma nasara domin hana ci gaba da zub da jini a ƙasar ta Siriya.

Shugabar gwamnatin Jamus Angela Merkel ta fito fili ta nuna cewar ba ma kawai takaicin hawa kujerar na ƙin na ƙasashen Rasha da China take yi ba, abin ma dai ya razana ta. Hawa kujerar na ƙi da gaggan ƙasashen biyu suka yi a ƙarshen makon da ya gabata, ta hana wanzar da ƙudurin dake Allah waddai da matakai na rashin imanin da ake ɗauka a Siriya. Bayan ganawar da suka yi da shugaba Sarkozy na Faransa a birnin Paris, Merkel tayi nuni da cewar:

"Abin da nike so na faɗa a nan shi ne, wajibi ne Rasha ta tambayi kanta da kanta ko shin nan gaba tana so ne ta zama wani abin misali na tarihi, inda zata riƙa bin manufofin da suka yi daura da na ƙungiyar haɗin kan Larabawa. Bana zaton hakan abu ne da zai cimma nasara. A saboda haka ba zamu dadara ba muna masu ba wa al'umar Siriya goyan baya da la'antar abubuwan dake faruwa a ƙasar."

Georg Streiter, mai magana da yawun shugabar gwamnatin a birnin Berlin ya fito ƙarara yana mai faɗa wa manema labarai cewar:

"Shugaba Assad bai cancanci ci gaba da mulkin ƙasarsa ba. Muna miƙa kira gare shi da ya share hanyar miƙa mulki a cikin ruwan sanyi. Ƙungiyar haɗin kan Larabawa ta tsara wani shiri wanda zai taimaka a fita daga mawuyacin halin da ake ciki yanzu a ƙarkashin wata gwamnati ta riƙon ƙwaryar da zata ƙunshi dukkan jam'iyyun ƙasar. Kamata yayi wannan shiri ya samu goyan bayan kwamitin sulhu na Majalisar Ɗinkin Duniya, amma ba a hana wanzuwarsa ba."

Babban abin da ake fata shi ne, shawarwarin da ministan harkokin wajen Rasha Sergeij Lavkov zai gudanar a ziyararsa a birnin Damakus, su taimaka fadar mulki ta Mosko ta canza salon tunaninta, kamar yadda kakakin ma'aikatar harkokin wajen Jamus Andreas Peschke ya nunar. Tuni ma dai ministan harkokin wajen Jamus Guido Westerwelle ya ba da shawarar kafa wani kwamitin tuntuɓar juna da zai ƙunshi wakilan Majalisar Ɗinkin Duniya dake la'antar matakan gwamnatin Siriya da na ƙasashen Larabawa domin tattauna alƙiblar da za a fuskanta nan gaba. Su ma dai 'yan hamayya a Berlin sun bayyana ɓacin ransu game da kujerar na ƙin a New York. Shugabar jam'iyyar masu ra'ayin gurguzu ta Linke Gesine Lötzsch tayi kira ga gwamnati da ta gabatar da wani sabon ƙuduri a kwamitin sulhun na Majalisar Ɗinkin Duniya. Sai dai kuma ta ce bai kamata wannan ƙuduri ya ƙunshi wani mataki na soja kamar yadda lamarin ya kasance a Libiya ba. Ita ma Claudia Roth, shugabar 'yan the Greens ta kwatanta matakin na Rasha da China tamkar wata mummunar taɓargaza. Ta ce ga alamu ƙasashen biyu, ba maganar zaman lafiya da kwanciyar hankali ko girmama haƙƙin ɗan Adam ce ta dame su ba, maslaharsu ce kawai suka sa gaba.

Mawallafi: Betiona Marx/Ahmad Tijani Lawal

Edita: Umaru Aliyu