Guguwar iska ta tafka barna a Amurka

Wata mahaukaciyar guguwar iska mai tafe da ruwan sama mai karfin gaske ce, ta lakume rayuka akalla ashirin da uku tare da lalata tarin gine-gine da katse hanyoyin wutar lantarki, a jihohin Mississippi da Alabama da ke kudancin Amurka.

Yanayin munin lamarin ya sa, hukumomi sun gargadi jama'a da su yi taka tsan-tsan a yayin da suke cewa, har yanzu akwai kalubalen da ake fuskanta mai barazana ga rayuwar al'umma a yankunan. Iftila'in ya tafka barna da kawo yanzu ba a iya tantance asarar da aka tafka daga guguwar iskar ta daren ranar Jumma'ar da ta gabata ba.