Komitin Sulhu zai ci gaba da mahawara kan Siriya
August 3, 2011
A yau laraba ne komitin Sulhu na Majalisar Ɗinkin Duniya zai ci gaba da tattaunawa akan halin da ake ciki na ƙaruwar boren adawa da Gwamnati a ƙasar Siriya.
Wakilan komitin 15 a jiya talata sun gaza cimma matsaya dangane da kalmar nan ta yin "Allah wadan matakan shugaba Bashar al-Assad" na kamen 'yan adawa da ake ci gaba da yi sakamakon gangami da zubar da jinin al'ummar ƙasar. Ƙasashen yammaci na turai na kira da a ɗauki tsauraran matakai, a yayinda China da Rasha suka yi barazanar hawa kan kujerar na ƙi dangane da kowane mataki mai tsauri aka ɗauka a hukumance. A kwanaki ukun da suka gabata dai, mutane 137 ne aka kashe a zanga-zangar ƙasar ta Siriya. A birnin Hama kaɗai dai mutane 93 ne suka rasa rayukansu, sakamakon somame da tankunan sojin Siriya suka kai a garin a ranar lahadi.
Mawallafiya: Zainab Mohammed Abubakar
Edita : Umaru Aliyu