NATO startet Raketenschutzschild

Shugabannin ƙungiyar ƙawacen tsaron NATO mai ƙasashe mambobi 28 dake halartar babban taron da birnin Chicago na ƙasar Amirka ke karɓar baƙunci, suka ce ƙaddamar da fara aiki na wucin gadin, shi ne mataki na farko a burin da ƙungiyar ta sanya a gaba na kammala samar da na'urar kariyar nan da shekara ta 2020, kamar yanda sakatare janar na ƙungiyar NATO Anders Fogh Rasmussen yayi ƙarin haske:

" Ya ce, wannan shi ne mataki na farko na cimma manufar da muka sanya a gaba na dogon lokaci na samar da cikakkiyar kariya ga ɗaukacin al'ummomin ƙasashen Turai dake da wakilci a cikin ƙugiyar ƙawancen tsaron NATO tare da yankuna da kuma dakarun su."

Sabuwar na'urar wucin gadin dai tana iya bada kariya ne ga makamai masu linzami ne masu gajere da kuma matsaƙaicin zango, ta hanyar yin anfani da wasu na'urorin dake ƙasar Turkiyya da kuma waɗanda ke kan manyan jiragen ruwan Amirka a tekun Bahr Rum, wadda kuma ake sarrafawa daga wata cibiyar dake garin Ramstein na ƙasar Jamus.

Ƙaddamar da na'urar ta zo ne duk kuwa da hannun rigar da ƙungiyar NATO ke yi da ƙasar Rasha akan manufar samar da ita, inda Rashar ta nemi samun tabbaci - a bisa doka na cewar ba wai don ita aka samar ba, kana Amirka ta ce ƙungiyar ta yi hakanne domin samun kariya daga harin da Iran ka iya kaiwa Turai ɗin.

Ƙudirin yin aiki tare domin kammala samar da na'urar

Sabuwar na'urar bada kariya ga Turai daga harin makamai masu linzamin dai za ta kammala ne a shekara ta 2020 ne bayan samar da wasu na'urorin da za ta yi aiki tare da su da za'a dasa a ƙasashen Romaniya da Poland, abinda kuma shugaban Amirka Barak Obama ya bayyana ƙudirin cewar ƙungiyar ba za ta yi ƙasa a gwiwa ba wajen cimma wannan burin:

" Ya ce kamar dai yadda muka sadaukar da kawunan mu baki ɗaya wajen warware matsalolin tsaro na bai ɗaya da muke fuskanta, za mu ci gaba da haɗin kai wajen kaiwa gaci a bisa wannan manufar."

A ƙarƙashin shirin samar da na'urar bada kariyar kuma, ƙugiyar ƙawancen tsaron NATO ta sanya hannu akan yarjejeniyar samar da mutum mutumi na roba, wanda za ta yi anfani da shi wajen lalata bama baman da ake dasawa a gefen tituna da kuma samar da jiragen saman yaƙin da suke sarrafa kawunansu wajen yin sintiri da kuma ƙaddamar da hare hare ta sararin samaniya.

Jinkirta janyewar dakarun Faransa daga Afghanistan

A lokacin taron NATOn kuma shugaban Faransa Farancois Hollande ya yi anfani da damar wajen ganawa tare da shugaban Afghanistan Hamid Karzai inda ya jaddada gudummowar da Faransa za ta baiwa ƙasar sa ta fannin bayar da horo ga jami'an tsaronta a dai dai lokacin da take aiwatar da shirin janye dakarunta a wannan shekarar, kamar yadda ya yiwa Faransawa alƙawari a lokacin yaƙin neman zaɓe, alƙawarin da kuma shugabar gwamnatin Jamus Angela Merkel ta ce da kamata yayi Faransar ta jinkirta aiwatar dashi:

" Ta ce mu dai munso a ce Faransa ta ci gaba da kasancewa tare damu a cikin ƙawancen ISAF har wa'adin janyewar ta cika."

Dama dai NATO ta ajiye shekara ta 2014 ne a matsayin wa'adin kammala janye dakarunta daga Afghanistan.

Mawallafi : Saleh Umar Saleh
Edita : Mouhamadou Awal Balarabe