Jamus za ta sa ido kan iyakokinta

Nan ba da jimawa ba gwamnatin Jamus za ta sanar wa kungiyar tarayyar Turai shirinta na tsaurara bincike a kan iyakokinta da kasashen Poland da Jamhuriyar Czech da kuma Switzerland, domin dakile safara da kuma shige da ficen da ake yi ta barauniyar hanya.

Ministar harkokin cikin gidan Jamus Nancy Faeser ce ta sanar da hakan yau Litinin, inda ta ce kamar yadda 'yan sanda ke gudanar da sintiri a kan iyakar Jamus da Austria tun a shekarar 2015, to haka za rinka yi a kan iyakokinta da wadannan kasashe da ke makotaka da ita.