Jamus ta haye zuwa zagayen quarterfinal

Wasan da aka buga a birnin Dortmund, an tafi hutun rabin lokaci ne ba tare da samun wadda ta ci kwallo ba.

Bayan dawowa daga hutun rabin lokacin ne kuwa, dan wasan Jamus Havertz ya zura wa Denmark a bugun fenariti.

Haka nan shi ma dan wasan tsakiya na Jamus din Jamal Musiala, ya kara wata kwallon, abin da ya bai wa kasar damar zuwa zagayen quarter-final

Ruwan sama da tsawa sun haddasa tsaiko na mintuna 35 jim kadan da farawa.

Yanzu dai Jamus na iya gamuwa da walau Spain ko kuma kasar Georgia a zagayen quarterfinal a birnin Stuttgart a ranar Juma'a.