Masu kyamar baki na kara karbuwa a Jamus

A kuri'ar jin ra'ayin jama'a da kafar yada labarai ta Jamus ARD ta fitar bayan tattara bayanai tsakanin ranar 17 ga watan Satimba zuwa 19 ga watan, ya nunar da cewa jam'iyyar CDU da babbar abokiyar jam'iyyar wato CSU da jam'iyyar SPD za su iya samun kashi 45 cikin dari ne a zabe.

Kawancen na CDU/CSU masu ra'ayin mazan jiyan na da kashi 28 cikin dari ne, wannan kiyasi ya sanya jam'iyyun sun sami kaso mafi kankanta tun da aka fara irin wannan kuri'ar jin ra'ayi a 1997. Ita kuwa jam'iyyar ta AfD na da 18 cikin dari sabanin 12.6 cikin dari da take da shi a Satimbar shekarar bara.