Hare-haren bama-bamai a Kadunan Najeriya

A Najeriya wasu mutane da ba a tantance ko su wanene ba sun tayar da bama-bamai a wurare daban daban na birnin kaduna da ke arewacin ƙasar. Kakakin ƙungiyar agajin gaggawa ta ƙasa wato Yushua Shuaib ya bayyana wa kanfanin dillancin labarai na Reuters cewa mutane da dama ne suka jikata bayan tashin bama-bamai a kusa da wata cibiyar sojoji, da kuma kan babbar gadar da ke haɗa ɓangarori biyu na birnin na Kaduna.

Wannan harin ya zo ne a daidai lokacin da Najeriya ta ke fiskantar hare-haren bama-bamai daga ƙungiyar da aka fi sani da suna Boko Haram. Dama dai kuma birnin na Kaduna da ya ƙunshi mabiya manyan addinan ƙasar ya saba fiskantar rikice rikice na ƙabilanci da kuma na addini.

Mawallafi: Mouhamadou Awal
Edita: Umaru Aliyu