Girka: Gobara ta sa jama'a yin kaura

Dubban jama'a na ta kokarin ficewa daga gidajensu domin tsira da rayuwarsu sakamakon tsananin zafi da ke kara rura gobarar daji a wasu yankuna na kasar Girka

Kasar ta Girka na fuskantar zafi mafi tsanani cikin fiye da shekaru 30 da suka gabata.

Gobarar wadda jami'an kwana kwana ke ta kokarin kashewa ba dare ba rana ta kone gidaje fiye da 90 da wuraren kasuwanci 27 da kuma motoci fiye da 80 a cewar ministan kare rayuwar al'umma Nikos Hardalias.

Bakin hayaki ya turnuke birnin Athens yayin da a waje guda jama'a ke fama da matsalolin numfashi.

An dai bukaci tsofaffi su zauna a cikin gidajensu.