Coronavirus na kara yaduwa a duniya

Rahoton na Hukumar Lafiya ta Duniya wato WHO, ya nunar da cewa, kasashen da aka fi samun karuwar wadanda suka kamun a rana guda sun hadar da Amirka da Brazil da Indiya da kuma Afirka ta Kudu. Rahoton sababbin kamuwa da cutar na baya-bayan nan da Hukumar Lafiya ta Duniyar WHO ta fitar dai, na nuni da cewa mutane sama da dubu 228 ne ke kamuwa a kowacce rana, yayin da adadin wadanda cutar ke yin ajalinsu a kullum ya kasance kimanin 5,000.

A wani kiyasi na kamfanin dillancin labarai na Reuters, kawo yanzu adadin wadanda suka kamu da annobar cutar ta coronavirus a duniya ya tasamma miliyan 13, abin da ke nuni da cewa cutar da aka tabbatar ta halaka sama da mutane dubu 565 a duniya cikin watanni bakwai, na ci gaba da yaduwa.