Corona: Trump ya yi alkawarin samar da rigakafi

Mr. Trump ya sanar da haka a yayinda ya yi fitowa ta farko a bainar jama'a tun bayan sanar da kayar da shi a zaben kasar da ya gabata.

Wannan matsaya ta shi na zuwa ne a yayinda coronar ta halaka mutum 1,300,000 a cikin mutane 53,000,000 da ta kama a sassa daban-daban na duniya. Kwararru na kira ga Amirka da ta kara daukar mataki domin coronar ta halaka mutum sama da 240,000 ta kuma kama mutum 10,000,000 a kasar. To amma Donald Trump ya ce duk matakin da za a dauka babu maganar sanya dokar kulle, yana mai alkawarin cewa za a samarwa da Amirka rigakafin cutar daga nan zuwa watan Afrilu mai zuwa.