Chen Guancheng ya tsere daga gidansa

A kasar China fitaccen dan rajin kare hakkin bil Adaman nan, Chen Guancheng ya tsere daga daurin talalar da ake masa a gidansa. Danginsa da kungiyoyin kare hakkin bil Adama na kasa da kasa sun ce Chen wanda makaho ne mai shekaru 40 ya tsere ne wa jami'an da ke tsare da shi ne a kauyen Dongshigu da ke lardin Shandong na gabashin kasar. Kungiyar kasar ta China da ke gudun hijira a Amirka, wato ChinaAid ta ba da rahoton da ke nuni da cewa ya nemi mafaka a birnin Beijing. Shi dai Chen yana gwagwarmaya ne domin kau da manufar tilasta zubar da ciki da kuma juya mahaifa a kasar ta China. An ci gaba da tsare shi a gidansa ne bayan da ya cika rabin wa'adin hukuncin daurin da aka yanke masa a gidan kaso a watan Satumban shekarar 2010.

Mawallafiya: Halima Balaraba Abbas
Edita: Umaru Aliyu