Bukatar karfafa alakar Jamus da Chaina

Firaministan Chaina Li Qiang ya yi wadannan kalaman ne yayin ziyararsa a Jamus, kuma suna zuwa ne a daidai lokacin da Jamus din ke kokarin samun hanyar da za ta rage dogaro da Chaina. Wannan dai shi ne karo na farko da Li ya kai ziyara kasashen ketare tun bayan zamowarsa firaminista, kuma a yayin ziyarar tasa ya kara jaddada bukatar Beijing na karfafa dangantakar da ke tsakaninta da kungiyar Tarayyaar Turai EU a daidai lokacin da kasarsa ke kara fuskantar suka daga kungiyar ta EU. Li dai ya ce akwai bukatar Jamus da Chaina su hada kai wajen samar da ingantaccen muhalli, yayin da shugaban gwamnatin Jamus Olaf Scholz da ke zaman mai masaukin baki ke cewa dangantaka ta kusa a bangaren yaki da sauyin yanayi shi ne babban abin da suka fi bai wa muhimmanci a yanzu.