An yi girgizar kasa mai karfin 6.3 a Girka

Kafofin yada labarai na Girka sun ce, an ji karfin girgizar kasar har i zuwa wasu tsibirai da kuma Tekun Aegean, nesa da yankunan da mutane ke zaune. Wannan iftila'in ya zo makonni biyu bayan girgizar kasa mai karfi maki 5.8 a ma'aunin Richter a Girka, wacce ta yi sanadin mutuwar mutum daya, ta raunata goma kuma ta haifar da gagarumar barna musamman a kauyen Arkalohori.

Ita dai kasar Girka ta saba fuskantar iftila'in girgizar kasa a tarihinta. Ko a ranar 3 ga Maris na wannan shekarar, sai da girgizar kasa ta yi sanadiyyar mutuwar mutum daya tare da raunata goma da kuma barnata dukiya mai yawa.  A ranar 30 ga watan Oktoba 2020 ma dai, girgizar kasa mai karfin maki 7 a ma'aunin Richter ta afku a tekun Aegean tsakanin tsibirin Samos na Girka da garin Izmir na Turkiyya, inda ta kashe mutanen 114 a Turkiyya da kuma biyu a Samo.