An kona ofishin jakadancin Jamus a Sudan
September 14, 2012A kasar Sudan dubun dubatan musulmi dake zanga zangar nuna bacin rai da fim din da ya yi batanci ga addinin musulunci sun afkawa ofisoshin jakadancin Jamus dana Burtaniya a birnin Khartoum inda suka yi mummunan barna. 'Yan sanda sun harba barkonon tsohuwa domin tarwatsa masu zanga zangar yayin da wasu masu daga cikinsu suka dare rufin ginin wasu kuma suka tunkari gaban ginin inda suka maye gurbin tutar Jamus dana Islama.
Bugu da kari masu zanga zangar sun datse hanyoyi domin hana motar kwana kwana kashe wutar gobarar da suka cinna a ofishin jakadancin. Ministan harkokin wajen Jamus Guido Westerwelle yace ma'aikatan ofishin jakadancin lafiyarsu lau suna kuma tuntubarsu kai tsaye. Ita ma ma'aikatar harkokin wajen Birtaniya wadda aka lalata ofishinta na jakadanci a Sudan ta ce tana bin lamarin dake faruwa a Khartoum sau da kafa.
Mawallafi: Abdullahi Tanko Bala
Edita: Mouhamadou Awal