An kammala taron Majalisar Al'ummar China

A kammala taron shekara-shekara da majalisar al'ummar China, wanda aka yi kwanaki goma ana yi. A zahiri dai taron wakilan na jeka na yika kane, inda basa sauya wani abun da gwamnati ta tsara. Amma dai za a iya cewa taron ya baiwa wakilan sanin kaɗan daga manufofin gwamnatin ƙasar, wanda aka ɓoye wa sauran duniya.

Babban abinda taron ya maida hankali dai shine batun tattalin arzikin Chin, a jawabin da firiminyan ƙasar Wen Jiabao ya gabatar wa mahalarta taron, ya shaida musu cewa an samu koma baya kaɗan na haɓakar tattalin arziki. Hakan dai yana nufin ba za a samar da guraben aiki yi masu yawa kamar yadda ake buƙata ba. Ammma dai daga ƙarshe an tattabar da cewa tattalin arzikin ƙasar zai ci gabada kasancewa mai ƙarfi. Ko mi ya sa yanzu China ta yi hasashen samun raguwar haɓaka. Gu ZuXuewu shine daraktan cibiyar nazari ta Center for Global Study dake birnin Bonn.

"A yanzu Gwamnatin ƙasar ta sake tsare-tsaren ta na tattalin arziki, don haka waɗannan sauye-sauye sune za su shafi haɓakar da ƙasar ke yi. Idan mutum na son samar da wasu ababen walwala, to ba lallai bane sai ya rage wuraren aikin yi"

Manufa dai itace ingantaccen ɗorewar tattalin arziki dake zabura. A yanayin da tattalin arzikin Amirka da ƙasashen Turai yake cikin matsala, to haka ma ya shafi fitar da haja da ƙasar China ke yi izuwa ƙasashen ƙetare, mai yiwa hakan ne ya shafi habakar tattalin arzikin ƙasar. A ra'ayin masanin siyasa Willy Lam dake Hongkong

"Kada fa a man ta da cewa habakar tattalin arziki ya samu koma baya tun shiga uku da tattalin arzikin duniya ya samu a shekara ta 2008, hakan ya sa manyan wurare da ake zuba jarin sun samu koma baya. Amma wannan bawai shine babban mafita ga ƙasar China ba, abinda zai taimaki ƙasar shine, ta yadda za ta biya buƙatun yan ƙasar ta"

Ɓangaren soji a ƙasar ta China dai ya samu ƙarin kason sama da kashi 11 cikin dari a bana. Ma'aikatar tsaron ƙasar an raba ta gida biyu kuma ya haɓa sosai yan shekarun nan. China tana son inganta matsayin ta a yankin Asiya, kuma tana lura da take-taken ƙasar Amirka a yankin baki ɗaya. iniji Lam

"Wannan ya shafi harkar soji. Ƙasar Amirka a dalilin rugujewar tattalin arzikinta, dole ta rage kudin da take kashewa ayyukan sojinta. Ga ƙasar China hakan wata dama ce ta inganta ƙarfin sojin ruwa da na saman ta"

Waɗannan matsaloli dai ba abune da taron wakelan zauren al'ummar ƙasar zai cimma ba, yanzu abin jira shine bayan sauya shugabancin ƙasar da za a yi a kaka'ar bana, inda Hu Jintao da Wen Jiabao za su miga ragamar mulki ga sabbin jini. Bayaga shugaba da firimiyan, akwai wasu gurabe bakwai dake da ƙarfi a tsakiyar gwamnatin China wadanda suma za a maye gurbinsu a bana. Daga nan za a ga inda ƙasar ta dosa.

Mawallafa: Haiye Cao/Usman Shehu Usman

Edita: Umaru Aliyu