An hallaka dakarun kiyaye zaman lafiya hudu a Sudan
October 3, 2012Wani harin kwanton ɓauna ya yi sanadiyar hallaka dakarun kiyaye zaman lafiya huɗu, na Majalisar Dinkin Duniya da Tarayyar Afrika, a Lardin Darfur na Yammacin ƙasar Sudan.
Rundinar ta ce an kai wannan hari cikin daren jiya Talata, yayin da dakarun Najeriya ke aikin sintiri, kuma akwai wasu dakarun takwas da su ka samu raunika.
Tuni shugaban dakarun kiyaye zaman lafiyar na Majalisar Dinkin Duniya da Tarayyar Afrika Lt Gen Patrick Nyamvumba, ya nemi mahukuntan birnin Khartoum su farauto maharan.
Tun cikin shekara ta 2003 bayan ƙazancewar lamuran ƙasar ta Sudan, aka tura dakarun na kiyaye zaman, kuma tun daga wannan lokaci kawo yanzu kimanin dakaru 42 su ka hallaka yayin neman wanzar da zaman lafiyar.
Mawallafi: Suleiman Babayo
Edita: Umaru Aliyu