An gano masu shigar da makaman da ke rura rikicin Sudan
February 9, 2012Wani rahoto da kungiyar kare hakkin bil adama ta Amnesty International ta wallafa ya yi zargin cewa makamai daga kasashen China Rasha da Belarus na kara rura rikicin Sudan wanda ya kai tsawon shekaru tara yanzu.
A rahoton da ya fito da yammacin Laraba, kungiyar ta ce an gano makaman da ake sarrafawa a kasashen a yankin Dafur da sauran wuraren da ke fama da rikicin kusa da iyakar Sudan da Sudan ta Kudu.
Rahoton ya kuma bayyana yadda kasashen uku ke cigaba da baiwa kungiyoyin da ke tada kayar baya wadannan makamai, duk da cewa sun san fararen hula ake kai ma farmaki da su. Wadannan makamai dai sun hada da albarusai, da rokoki da kuma motocin yaki masu sulke
Kungiyar ta Amnesty ta yi kira ga Majalisar Dinkin Duniya da ta mayar da hankali wajen dakatar da shigar makaman wandannan yankunan.
Mawallafiya: Pinado Abdu-Waba
Edita : Umaru Aliyu