በፓሪስ ‘‘ማራቶን ለሁሉም’’ በባዶ እግሩ የሮጠው ኢትዮጵያዊው ኤርሚያስ አየለ

በፓሪስ 2024 ኦሎምፒክ «ማራቶን ለሁሉም ፓሪስ 2024» በሚል በኦሎምፒክ ታሪክ የመጀመሪያ የሆነ አማተር ሯጮች የተሳተፉበት የ42 ኪ/ሜ ሩጫ ተካሂዷል።በዚህ ውድድር ብቸኛ ተሳታፊ  የነበረው ኢትዮጵያዊ ኤርሚያስ አየለ ሲሆን፤ በኢትዮጵያም ሆነ በአፍሪቃ ቀዳሚ የኦሎምፒክ አሸናፊውን አበበ ብቄላን ለመዘከር በባዶ እግሩ በመሮጥ ውድድሩን አጠናቋል።ኤርሚያስ አየለ ለበርካታ አመታት ታላቁ ሩጫ በኢትዮጵያን ያገለገለ ሲሆን፤ ከአወዳዳሪነት ወደ ተወዳዳሪነት ፊቱን ከመለሰ  ሁለት ዓመታት ገደማ ሆኖታል። ኤርሚያስ ከሌሎች ተወዳዳሪዎች በተለዬ በባዶ እግሩ በመሮጥ ቀደም ሲል በተሳተፈባቸው  ዓለም አቀፍ የጎዳና ውድድሮች የማራቶን ጀግናውን አበበ ብቄላን ዘክሯል።

ኤርሚያስ፤ በፓሪስ ኦሎምፒክም  ከሩጫው ባሻገር ለአፍሪቃ በተዘጋጄ ልዩ ህዝባዊ መድረክ ፤የጀግናውን አትሌት አበበ ብቄላ ቁርጠኝነት እና አይበገሬነት እንዲሁም ኢትዮጵያን ለዓለም ለማስተዋወቅ መቻሉን ገልጿል።በዚህም ደስተኛ መሆኑን ተናግሯል። «ህዝባዊ የጤና ሯጭ የተሳተፈው በኦሎምፒክ ታሪክ ለመጀመሪያ ጊዜ ነው።እና እዛ ላይ መሳተፍ በራሱ አንድ ትልቅ ቦታ አለው።በባዶ እግር ሆኖ ደግሞ የኢትዮጵያ አትሌቲክስ መሰረት የሆነውን አበበ ብቄላን ማስታወስ እና ሌሎችንም መዘከር ትልቅ ፋይዳ አለው።»በማለት ገልጿል።

ሙሉ ዝግጅቱን የድምፅ ማዕቀፉን ተጭነው ያድምጡ።

ሀይማኖት ጥሩነህ
ሂሩት መለሰ
ፀሐይ ጫኔ