چیمپیئنز لیگ: میسی کا نیا ریکارڈ، لیورکوزن کو کراری شکست

کلب فٹ بال کے مؤقر ترین چیمپیئنز لیگ مقابلوں کے ایک پری کوارٹر فائنل کی دوسری لیگ میں ہسپانوی کلب بارسلونا نے جرمن کلب بائر لیورکوزن کو سات ایک سے ہرا کر کوارٹر فائنل میں پیش قدمی کرلی ہے۔ گزشتہ ماہ لیورکوزن میں کھیلے گئے پہلے لیگ میں بارسلونا تین ایک سے جیتا تھا لہٰذا مجموعی طور پر بارسلونا نے یہ پری کوارٹر فائنل دس دو سے جیتا ہے۔

بدھ کی شب بارسلونا کے کیمپ نو میں کھیلے گئے اس میچ میں لیورکوزن کی ٹیم مکمل طور پر بے بس دکھائی دی۔ ارجنٹائن سے تعلق رکھنے والے بارسلونا کے اسٹار کھلاڑی میسی نے شاندار کارکردگی کا مظاہری کرتے ہوئے میچ میں پانچ گول کیے، جو کہ کسی بھی کھلاڑی کی جانب سے چیمپیئنز لیگ کے میچ میں انفرادی طور پر سب سے زیادہ گول ہیں۔ اس طرح میسی اس برس اس ٹورنامنٹ میں اب تک سب سے زیادہ گول کرنے والے کھلاڑی بھی ہیں۔ انہوں نے اب تک چیمپیئنز لیگ میں بارہ گول کیے ہیں۔ گزشتہ دو برسوں سے وہ چیمپیئنز لیگ کے ٹاپ اسکورر ہیں۔

بارسلونا کی جانب سے میسی نے پہلے ہاف میں دو گول اور دوسرے ہاف میں تین گول کیے۔ میچ کے دوسرے ہاف میں دو گول ٹیلو نے کیے۔ لیورکوزن کی ٹیم صرف ایک گول کر پائی۔

بدھ کو کھیلے گئے ایک اور میچ میں اپوئیل کی ٹیم نے اولمپک لیون کو پینیلٹی شوٹ آؤٹ میں چار تین سے شکست دی۔

گزشتہ روز چیمپیئنز لیگ میں اطالوی کلب اے سی میلان نے آرسنل کو جب کہ پرتگالی کلب بینفیکا نے روسی کلب پیٹرز برگ کو ہرا کر کوارٹر فائنل میں جگہ بنا لی تھی۔

رپورٹ: شامل شمس ⁄ خبر رساں ادارے

ادارت: ندیم گِل