ورلڈ کپ کوالیفائنگ راؤنڈ: جرمنی اور سویڈن کا میچ برابر

جرمنی اور سویڈن کے درمیان میچ برلن کے اولمپک اسٹیڈیم میں کھیلا گیا۔ میچ میں دونوں ٹیموں نے شاندار کھیل کا مظاہرہ کیا۔ یہ میچ سویڈن کی ٹیم جیت سکتی تھی اگر اس کے ایک کھلاڑی سے اوپن گول کرنے کا موقع ضائع نہ ہوتا۔ میچ کے آخری لمحات میں بھی جرمن ٹیم ایک گول سے جیت رہی تھی کہ دفاعی کھلاڑیوں کی غلطی سے میچ کے آخری لمحات میں سویڈن کی جانب سے راسموس ایلم (Rasmus Elm) نے اپنی ٹیم کی طرف سے چوتھا گول کر کے میچ کو برابر کر دیا۔

جرمنی اور سویڈن کے درمیان کھیلے گئے میچ میں اگر یہ کہا جائے کہ پہلا ہاف جرمنی کا تھا اور دوسرا ہاف سویڈن کا تو غلط نہیں ہو گا۔ جرمن ٹیم چار گول کی برتری حاصل کرنے کے بعد اس کو سنبھالنے میں ناکام رہی۔ پہلے ہاف میں جرمن فارورڈ میروزسلاف کلوزے نے آٹھویں اور پندرہویں منٹ میں گول کیے۔ اس کے بعد پہلے ہاف کے انتالیسویں منٹ میں جرمنی کے لیے پیئر میرٹے سیکر  (Per Mertesacker) نے تیسرا گول کیا۔ جب پہلا ہاف ختم ہوا تو جرمن ٹیم تین گولوں سے جیت رہی تھی۔

دوسرے ہاف کے گیارہویں منٹ میں جرمنی کی جانب سے مِڈفیلڈر میسوت اُوزل نے چوتھا گول کیا اور اس کے بعد سویڈن کی ٹیم نے ہمت کی اور گول کرنے کے سلسلے کا آغاز کر دیا۔ مشہور سویڈش فارورڈ زلاتان ابراہیمووِچ (Zlatan Ibrahimović) نے میچ کے باسٹھویں منٹ میں پہلا گول کیا۔ اس گول کے دو ہی منٹ بعد سویڈن کی جانب سے کارل مائیکل لُسٹِگ (Carl Mikael Lustig) نے دوسراگول کر دیا۔ اس فرق یعنی جرمنی چار اور سویڈن دو گول کے ساتھ میچ آگے بڑھتا رہا۔ دوسرے گول کے 14 منٹ بعد سویڈن کے ژوہان ایلمینڈر (Johan Elmander) نے ایک اور گول کر کے جرمن برتری کو مزید کم کر دیا۔ میچ کے آخری لمحات میں سویڈن کی ٹیم میچ برابر کرنے میں کامیاب رہی۔ میچ برابر کر کے جرمن ٹیم نے دو قیمتی پوائنٹس ضائع کر دیے۔

ورلڈ کپ سن 2014 کے لیے یورپی زون سے کل 13 ٹیموں کا انتخاب کیا جائے گا۔ کل 53 ٹیمیں اس وقت کوالیفائنگ مرحلے میں شریک ہیں۔ ان ٹیموں کو نو مختلف گروپوں میں تقسیم کیا گیا ہے۔ آٹھ گروپوں میں چھ چھ ٹیمیں ہیں اور گروپ آئی میں پانچ ٹیمیں ہیں۔ ہر گروپ کی ونر ورلڈ کپ کے لیے کوالیفائی کر جائے گی۔ دوسرے مقام کی ٹاپ آٹھ ٹیموں کے درمیان دوبارہ میچ ہوں گے اور ان میں سے چار جیتنے والی ٹیمیں ورلڈ کپ کا حصہ بنیں گی۔

جرمن ٹیم گروپ سی میں ہے۔ اس گروپ کی دیگر ٹیموں میں جمہوریہ آئر لینڈ، سویڈن، آسٹریا، قزاقستان اور فارو جزائر ہیں۔ جرمنی نے جمہوریہ آئر لینڈ کو بارہ اکتوبر کو ڈبلن کے اویوا اسٹیڈیم میں کھیلے گئے میچ میں ایک گول کے مقابلے میں چھ گول سے ہرایا تھا۔ کوالیفائنگ مرحلے میں جرمنی کا اگلا میچ قزاقستان کے خلاف ہے اور یہ میچ اگلے سال 22 مارچ کے روز قازقستان کے شہر الماتے میں کھیلا جائے گا۔

 ah / ab (dpa)