مالی میں توریگ باغیوں کا ملک کے شمالی حصوں پر کنٹرول

ہفتے کو باغی بھاری ہتھیاروں سے لیس ٹرکوں کے ساتھ ملک کے شمال میں واقع شہر گاؤ میں داخل ہو گئے۔ گاؤ کے ایک رہائشی نے خبر رساں ادارے اے ایف پی کو فون پر بتایا کہ توریگ باغی شہر پر قبضہ کرنے کی کوشش کر رہے ہیں جبکہ فوج ہیلی کاپٹروں کی مدد سے اپنی پوزیشنوں کا دفاع کر رہی ہے۔

مالی کی فوجی جنتا کے سربراہ کیپٹن امادو سانوگو نے ہفتے کی شب ایک بیان میں کہا کہ جنگ زدہ علاقے کے نزدیک شہری آبادی کی صورت حال کو دیکھتے ہوئے انہوں نے فوج کو حکم دیا ہے کہ وہ لڑائی کو زیادہ طول نہ دے۔

جنتا کے قریبی ذرائع کا کہنا ہے کہ فوج کو لڑائی سے روکنے کا حکم دینے کا مقصد دراصل وہاں سے اُسی طرح پسپائی اختیار کرنا ہے جیسا کہ فوج نے باقی علاقوں سے کی ہے۔

گاؤ شہر دارالحکومت بماکو سے ایک ہزار کلومیٹر دور ہے اور وہاں ملک کے شمالی علاقوں کا فوجی ہیڈکوارٹر قائم ہے۔

بماکو میں اے ایف پی کے ایک نمائندے کو بھیجے گئے خط میں Movement for Unity and Jihad in West Africa نامی ایک اسلامی شدت پسند گروپ نے دعوٰی کیا کہ گاؤ شہر پر حملہ انہوں نے کیا ہے۔ اس گروپ کے بارے میں یہ خیال ہے کہ وہ القاعدہ کی شمالی افریقہ کی شاخ سے علیحدہ ہو جانے والا ایک دھڑا ہے۔ دہشت گرد تنظیم کی یہ شاخ Al-Qaeda in the Islamic Maghreb کہلاتی ہے۔

ابھی ایک روز قبل ہی توریگ باغیوں نے ایک نزدیکی شہر کیدال پر قبضہ کر کے فوج کو وہاں سے پسپا ہونے پر مجبور کر دیا تھا۔

اُدھر ملک کی فوجی جنتا کے نمائندوں نے برکینا فاسو میں مغربی افریقی بلاک کے مذاکرات کار اور ملک کے صدر Blaise Compaore سے ملاقات کی اور ملک میں آئینی نظام بحال کرنے کا وعدہ کیا۔

بلاک کے موجودہ چیئرمین ملک آئیوری کوسٹ کے صدر اُلاسانے اواتارا نے کہا ہے کہ ضرورت پڑنے پر مالی میں مداخلت کے لیے دو ہزار فوجیوں کو تیار رہنے کا حکم دیا گیا ہے۔

اس وقت مالی کے بیشتر شمالی مشرقی حصوں پر توریگ باغیوں اور اسلامی گروپوں کا قبضہ ہو چکا ہے اور صرف ٹمبکٹو چھاؤنی ہی ابھی تک ان سے محفوظ ہے۔

مالی میں بظاہر توریگ باغیوں کی پیشقدمی کو روکنے کے معاملے پر صدر امادو تومانی کے ساتھ اختلافات کے بعد 22 مارچ کو فوج نے حکومت کا تختہ الٹ کر اقتدار پر قبضہ کر لیا تھا۔ اس کے بعد سے وہ بین الاقوامی تنہائی کا شکار ہے۔ مغربی افریقی ملکوں کی اقتصادی کمیونٹی نے جمعرات کو نئی بماکو حکومت کو جمہوری ادارے بحال کرنے کے لیے 72 گھنٹے کا الٹی میٹم دیا تھا جس پر عمل نہ کرنے کی صورت میں ملک پر 'اقتصادی اور سفارتی پابندیاں‘ لگانے کی دھمکی دی تھی۔ مالی کے ہمسایہ ملکوں نے بھی اس کے ساتھ ملنے والی اپنی تمام سرحدیں بند کر رکھی ہیں۔

رپورٹ: حماد کیانی / خبر رساں ادارے

ادارت: ندیم گِل