فٹ بال: کئی یورپی ملکوں میں قومی چیمپئن ٹیموں کا فیصلہ ہو گیا
18 مئی 2009اسپین میں ایف سی بارسلونا کی ٹیم نے ہفتے کو ہی بغیر کوئی میچ کھیلے اُنیس ویں مرتبہ پریمیئر لیگ ٹائیٹل جیت لیا کیونکہ اُس کی سب سے بڑی حریف ٹیم ریئل میڈرڈ وِلاریال کے خلاف اپنا میچ دو کے مقابلے میں تین گول سے ہار گئی تھی۔ اگرچہ اتوار کو بارسلونا کی ٹیم آر سی ڈی مایورکا کے خلاف اپنا میچ ایک کے مقابلے میں دو گول سے ہار بھی گئی لیکن اِس سے اُس کے چیمپئن ہونے پر کوئی فرق نہیں پڑتا تھا۔
بارسلونا کے چیمپئن بننے پر اِس ہسپانوی شہر میں رات گئے تک کوئی چالیس ہزار پُرجوش شائقین نے زبردست جشن منایا گیا۔ اِس موقع پر بارسلونا شہر کے مرکزی حصے میں پُرتشدد ہنگامے بھی ہوئے، جن کے نتیجے میں گیارہ پولیس اہلکاروں سمیت اکیاون افراد زخمی ہو گئے۔
اب بارسلونا کی نظریں چیمپئنز لیگ کے اُس اعزاز پر لگی ہیں، جس کے لئے اُس کا مقابلہ ستائیس مئی کو انگلش کلب مانچسٹر یونائیٹڈ کے ساتھ اٹلی کے دارالحکومت روم میں ہو گا۔ تاہم مانچسٹر یونائیٹڈ کی ٹیم میں بھی خود اعتمادی کی کوئی کمی نہیں کیونکہ اِسی وِیک اَینڈ پر یہ ٹیم بھی اٹھارویں مرتبہ انگلش لیگ کا ٹائیٹل جیت کر قومی چیمپئن بن گئی۔ اِس کے لئے اُس کا آرسینال کے خلاف میچ صفر صفر سے برابر کرنا بھی کافی رہا۔
اُدھر اٹلی میں انٹر میلان کی ٹیم نے ہفتے کو مسلسل چوتھی اور مجموعی طور پر سترہویں مرتبہ قومی چیمپئن بننے کا اعزاز حاصل کیا، جب دوسرے نمبر پر موجود اُس کی سب سے بڑی حریف ٹیم اے سی میلان یُوڈینِیس کے خلاف اپنا میچ ایک کے مقابلے میں دو گول سے ہار گئی۔ کل اتوار کو نئی اطالوی قومی چیمپئن ٹیم انٹر میلان نے Siena کی ٹیم کو صفر کے مقابلے میں تین گول سے شکست دیتے ہوئے اپنی شاندار کامیابی کا گویا جشن منایا۔