سری سانت اور دیگر کھلاڑیوں پر اسپاٹ فِکسنگ کا الزام ’ثابت‘

بھارتی جریدے انڈین ایکسپریس نے دعویٰ کیا ہے کہ بھارتی کرکٹ بورڈ کی اندرونی تفتیش سے ثابت ہوا ہے کہ ٹیسٹ کرکٹر سری سانت اور دیگر تین بھارتی کرکٹرز انڈین پریمیئر لیگ کے دوران اسپاٹ فِکسنگ کے مرتکب ہوئے تھے۔ بورڈ کے اینٹی کرپشن کے محکمے کے سربراہ روی ساوانی کا کہنا ہے کہ بورڈ نے دو ایسے کھلاڑیوں کو بھی قصور وار پایا ہے جنہوں نے سٹے بازوں کی جانب سے رابطہ کیے جانے کے باوجود بورڈ کو اس بابت لا علم رکھا۔

سری سانت، اجیت چنڈیلا اور انکیت چاون کو متعدد الزامات میں قصور وار پایا گیا ہے۔ ان الزامات میں سے ایک یہ بھی تھا کہ ان کھلاڑیوں نے رشوت لے کر پہلے سے فی اوور رنز طے کر لیے تھے۔

چوتھے کھلاڑی امیت سنگھ پر الزام تھا کہ انہوں نے کھلاڑیوں اور سٹے بازوں کے درمیان بات چیت کروائی۔ ساوانی نے سنگھ کو ایسی مچھلی قرار دیا ہے جس نے سارے تالاب کو گندہ کیا۔

سدارتھ تری ویدی اور اکیس سالہ ہمریت سنگھ کو اسپاٹ فِکسنگ کے الزام سے بری کر دیا گیا ہے تاہم ان پر نسبتاً نرم الزام ثابت ہوا ہے کہ انہوں نے بورڈ کے عہدیداروں کو سٹے بازوں کی جانب سے رابطہ کیے جانے کے بارے میں آگاہ نہیں کیا۔

ساوانی اس رپورٹ کو بھارتی کرکٹ بورڈ کے سامنے باضابطہ طور پر پیش کریں گے اور تجویز دیں گے کہ کھلاڑیوں پر پانچ سال سے لے کر تا حیات پابندی عائد کی جائے۔

انڈین ایکسپریس کی رپورٹ کے مطابق ساوانی کا کہنا ہے: ’’ڈسپلنری کمیٹی میری رپورٹ کی روشنی میں کھلاڑیوں پر پابندیاں لگا کر یہ پیغام دے سکتی ہے کہ بی سی سی آئی کرپشن کو کسی صورت برداشت نہیں کرے گی۔‘‘

ساوانی کا مزید کہنا تھا کہ کھلاڑیوں کے عمل سے ثابت ہوا ہے کہ ان کو دی جانے والی اینٹی کرپشن کی تعلیم فائدہ مند ثابت نہیں ہوئی ہے، لہٰذا یہ کھلاڑی کسی طرح کی رعایت کے بھی حق دار نہیں ہیں۔

بی سی سی آئی کے ترجمان نے انڈین ایکسپریس کی رپورٹ پر تبصرہ کیے بغیر کہا کہ ساوانی کی رپورٹ انتیس ستمبر کو بورڈ کی سالانہ جنرل میٹنگ میں پیش کی جا سکتی ہے جہاں اس بارے میں بات چیت ہو گی۔

خیال رہے کہ مذکورہ چار کھلاڑی ان انتالیس افراد میں سے ہیں جن پر آئی پی ایل کے کرپشن اسکینڈل میں ملوث ہونے کے بارے میں بھارتی پولیس تفتیش کر رہی ہے۔

یہ چار کھلاڑی آئی پی ایل کی راجھستان روئلز ٹیم کے لیے کھیلتے تھے۔ سری سانت بھارت کی قومی ٹیم کے لیے بھی کھیل چکے ہیں۔