جرمن کپ: سیمی فائنل مرحلے میں

جرمن کپ کے کوارٹر فائنل مقابلوں میں بڑا اپ سیٹ ہوفن ہائیم فٹ بال کلب کی شکست ہے۔ ہوفن ہائیم کی ٹیم سیکنڈ ڈویژن میں کھیلنے والی ٹیم گروئتھر فوئرتھ (Greuther Fuerth) سے ایک گول سے ہاری۔ یہ گول میچ کے پہلے ہاف میں کیا گیا اور ہوفن ہائیم کی ٹیم گول برابر کرنے سے قاصر رہی۔ یہ گول کھیل کے 44 ویں منٹ میں اوشن نامی کھلاڑی نے کیا۔ ہوفن ہائیم کی ٹیم بنڈس لیگا کے فرسٹ لیول میں کھیلتی ہے۔

جرمن کپ کا ایک کوارٹر فائنل منگل کے روز کھیلا گیا تھا۔ اس میں بنڈس لیگا کی دفاعی چیمپئن ڈورٹمنڈ نے ہولشٹائن کیل کو چار گول سے ہرایا تھا۔ بقیہ تین کوارٹر فائنل بدھ کے روز کھیلے گئے۔ ان میں برلن شہر کے فٹ بال کلب ہیرتھا کو مؤنشن گلاڈ باخ کی ٹیم نے دو گول سے شکست دی۔ میچ کے دونوں ہاف بغیر کسی گول کے برابر رہے۔ مؤنشن گلاڈ باخ کی جانب سے دونوں گول اضافی وقت میں کیے گئے۔

جرمنی کے تاریخ ساز فٹ بال کلب بائرن میونخ نے بھی جرمن کپ کے سیمی فائنل میں کھیلنے کا اعزاز حاصل کر لیا ہے۔ بائرن میونخ نے اشٹٹ گارٹ کلب کو دو گول سے ہرایا۔ بائرن میونخ کی جانب سے یہ گول فرینک ریبری اور ماریو گومیز نے کیے۔ میونخ کا فٹ بال کلب اب تک پندرہ مرتبہ جرمن کپ جیت چکا ہے۔

جرمن کپ میں کل 64 ٹیمیں شرکت کرتی ہیں۔ ان میں 36 ٹیمیں بنڈس لیگا لیول ون اور ٹو کی شامل ہوتی ہیں۔ جب کہ درجہ سوم کی ٹاپ چار ٹیموں کےعلاوہ اکیس ٹیمیں مختلف علاقائی لیول کی ہوتی ہیں۔ تین اور ٹیمیں ٹاپ علاقائی فٹ بال ایسوسی ایشن کی ہوتی ہیں۔ ان ٹیموں کو بتیس بتیس کے دو گروپ میں تقسیم کردیا جاتا ہے۔ سن 1985 سے جرمن کپ کا فائنل میچ دارالحکومت برلن کے اولمپک اسٹیڈیم میں کھیلا جاتا ہے۔ اس برس فائنل بارہ مئی کو شیڈیول کیا گیا ہے جبکہ سیمی فائنل میچ مارچ کی بیس تاریخ کو کھیلیں جائیں گے۔

رپورٹ: عابد حسین

ادارت: عاطف بلوچ