یورپ لیگ: ہینوور اور شالکے پری کوارٹر فائنل مرحلے میں

گزشتہ رات یورپ لیگ کے گروپ آف 32 کے تمام میچوں کے دوسرے راؤنڈ کی تکمیل ہو گئی ہے۔ اس مرحلے کے بعد سولہ ٹیموں نے پری کوارٹر فائنل کے لیے کوالیفائی کر لیا ہے۔جرمن فٹ بال کلب ہینوور کا میچ بیلجیم کے کلب برو گے (Club Brugge) کے ساتھ برو گے شہر میں کھیلا گیا۔ اس میچ میں ہینوور کو ایک گول سے کامیابی حاصل ہوئی یہ گول افریقی ملک سینیگال سے تعلق رکھنے والے فارورڈ فٹ بالر میم بیرام ڈیاُوف (Mame Biram Diouf) نے پہلے ہاف کے اکیسویں منٹ میں کیا۔ اس گول کا بقیہ تمام وقت میں جرمن کلب نے شاندار انداز میں دفاع کیا۔ پہلے راؤنڈ میں ہینوور نے برو گے کلب کو ایک کے مقابلے میں دو گول سے ہرایا تھا۔

ایک اور جرمن کلب شالکے کو بھی یورپ لیگ کے پری کوارٹر فائنل مرحلے میں داخل ہونے کا اعزاز حاصل ہوا ہے۔ شالکے کا میچ اپنے ہوم گراؤنڈ گیلزن کرشن میں کھیلا گیا۔ اس کی مد مقابل ٹیم چیک جمہوریہ کا پلزن(Pilzen) کلب تھا۔ شالکے نے یہ میچ ایک کے مقابلے میں تین گول سے جیتا۔ اس سے قبل پہلے راؤنڈ کا میچ ایک ایک گول سے برابر رہا تھا۔

یورپ میں فٹ بال کلبوں کا سب سے اہم ٹورنامنٹ چیمپئنز لیگ تصور کیا جاتا ہے۔ اس کے بعد یورپ لیگ آتا ہے۔ دونوں ٹورنامنٹ کا نگران ادارہ یونین آف یورپی فٹ بال ایسوسی ایشن (UEFA) ہے۔ یہی ادارہ یورپی فٹ بال چیمپئن شپ کی میزبانی کرتا ہے۔ اس کی رکن یورپی ممالک کی تمام فٹ بال ایسوسی ایشن ہیں۔ کل ترپن ملک اس کے ممبر ہیں۔ اس کا صدر دفتر سوئٹزر لینڈ کے شہر نیوں (Nyon) میں قائم ہے۔

اگلے مرحلے کے پہلے راؤنڈ کے میچوں کا آغاز آٹھ مارچ کو ہو گا اور دوسرے راؤنڈ کی تکمیل ایک ہفتے بعد یعنی پندرہ مارچ کو ہو جائے گی۔ تمام ٹیموں کو ایک بار اپنے ہوم گراؤنڈ اور دوسری مرتبہ اپنی مخالف ٹیم کے میدان میں کھیلنا ہوتا ہے۔

روپورٹ: عابد حسین

ادارت: عدنان اسحاق