کروشیا اور سربیا کے ایک دوسرے کے خلاف نسل کشی کے مقدمے

بین الاقوامی قانون کے ماہرین کی رائے میں کروشیائی اور سربیائی حکومتوں نے بلقان کی گزشتہ خانہ جنگی کے دوران ایک دوسرے پر نسل کشی کے الزامات عائد کرتے ہوئے مقدمات تو دائر کر دیے ہیں لیکن عدالتی کارروائی کے نتیجے میں کسی بھی فریق کی کامیابی کا کوئی امکان نہیں ہے۔

کروشیا نے باقی ماندہ یوگوسلاویہ کے خلاف نسل کشی کے الزام میں دی ہیگ کی بین الاقوامی عدالت میں مقدمہ 1999ء میں دائر کیا تھا۔ اب 15 برس بعد سربیا کے خلاف سماعت اس لیے شروع ہوئی ہے کہ قانونی طور پر سربیا ہی سابق یوگوسلاویہ کی جانشین ریاست ہے۔

کروشیا کی طرف سے اس مقدمے کا مقصد یہ ثابت کرنا ہے کہ 1991ء سے 1995ء تک جاری رہنے والی جنگ کے دوران یوگوسلاویہ کے زیر کمان مسلح دستے اس نسل کشی کے مرتکب ہوئے تھے، جس دوران ’نسلی تطہیر‘ کے نام پر 10 ہزار سے زائد کروآٹ باشندے ہلاک کر دیے گئے تھے۔

اس مقدمے کے ذریعے 15 برس پہلے زاغرب حکومت واضح طور پر یہ چاہتی تھی کہ کروشیا کو اس جنگ کا نشانہ بننے اور اس سے متاثر ہونے والا ملک ثابت کیا جائے۔ اسی لیے آج تک کروشیا کی تمام حکومتیں ان عدالتی کوششوں کی کامیابی کے لیے فعال رہی ہیں۔

زاغرب حکومت کا کہنا ہے کہ اس مقدمے کے ذریعے سربیا کو اس بات کا پابند بنایا جانا مقصود ہے کہ تمام سرب جنگی مجرموں کے خلاف مقدمے چلائے جانا چاہییں، جنگ کے دوران کروشیا سے لُوٹی گئی ثقافتی املاک واپس کی جائیں، کروشیا کو زر تلافی ادا کیا جائے اور اس کے علاوہ بلغراد حکومت کو یہ وضاحت بھی کرنا ہو گی کہ ان 1400 سے زائد کروآٹ باشندوں کا کیا بنا جو جنگ کے زمانے سے آج تک لاپتہ ہیں۔

اس مقدمے کے بعد سن 2010ء میں سربیا نے بھی کروشیا کے خلاف نسل کشی کے الزامات سے متعلق ایک جوابی مقدمہ دائر کر دیا تھا۔ اس مقدمے میں دعویٰ کیا گیا ہے کہ 90 کے عشرے کی خانہ جنگی کے دوران کروشیا سرب نسل کے چھ ہزار سے زائد باشندوں کے قتل کے علاوہ دو لاکھ کے قریب کروشیائی سربوں کی کروشیا سے جبری بےدخلی کا مرتکب بھی ہوا تھا۔

بلغراد حکومت گزشتہ چند برسوں کے دوران کئی مرتبہ یہ اشارہ دے چکی ہے کہ اگر زاغرب میں کروشیائی حکومت سربیا کے ‌خلاف اپنا مقدمہ واپس لینے پر تیار ہے تو بلغراد میں سربیائی حکومت بھی نسل کشی سے متعلق اپنا دائر کردہ مقدمہ واپس لے سکتی ہے۔

اب دی ہیگ میں ان دونوں مقدمات سے متعلق کارروائی شروع ہونے کے بعد امکان ہے کہ 15 ججوں پر مشتمل عدالت میں باقاعدہ سماعت آئندہ کئی مہینوں تک جاری رہے گی۔

بین الاقوامی قانون کے ماہرین کے مطابق یہ دونوں مقدمات اس گزشتہ مقدمے کی طرح ہیں جو دی ہیگ ہی کی عدالت میں بوسنیا ہیرسے گووینا نے دائر کیا تھا اور جسے عدالت نے 2007ء میں خارج کر دیا تھا۔ یہ مقدمہ بوسنیا ہیرسے گووینا نے سربیا کے خلاف دائر کیا تھا اور بلغراد پر بوسنیائی مسلمانوں کی نسل کشی کے الزامات عائد کیے تھے۔

ان قانونی ماہرین میں زاغرب کے مشہور وکیل وَیلِیکو مِیلیےوِچ اور سربیا کے سابق وزیر داخلہ بوزو پرِیلےوِچ بھی شامل ہیں۔ ان کا کہنا ہے کہ کروشیا میں سربوں اور کروآٹوں دونوں نے ہی نسلی تطہیر سے کام لیا تھا، لیکن قانونی طور پر اسے نسل کشی نہیں کہا جا سکتا۔

بوزو پرِیلےوِچ کا کہنا ہے، ’’قانونی طور پر نسل کشی کی اصطلاح کی تعریف بڑی واضح ہے۔ اس لیے میری رائے میں سربیا اور کروشیا کی حکومتوں میں سے کوئی بھی اپنا دائر کردہ مقدمہ جیتنے میں کامیاب نہیں ہو سکے گی۔‘‘