دنیا کے سستے ترین شہر – ٹاپ ٹین
دی اکانومسٹ انٹیلی جنس یونٹ کی ایک تازہ رپورٹ کے مطابق سن 2018 میں بھی دنیا کے سستے ترین شہروں میں جنوبی ایشیائی شہر نمایاں رہے۔ ٹاپ ٹین سستے ترین شہروں کے بارے میں جانے اس پکچر گیلری میں۔
10۔ نئی دہلی
بھارتی دارالحکومت دنیا کا دسواں سب سے سستا شہر قرار پایا۔ دی اکانومسٹ کے مطابق نئی دہلی میں ایک کلو بریڈ کی اوسط قیمت 1.07 ڈالر رہی۔ ایک بوتل وائن کی قیمت انیس ڈالر، سگریٹ کی ڈبی قریب پانچ ڈالر جب کہ فی لیٹر پیٹرول کی قیمت ایک ڈالر سے کچھ کم رہی۔
9۔ بخارسٹ
یورپی ملک رومانیہ کا دارالحکومت بخارسٹ دنیا کا نواں سستا ترین شہر رہا۔ اس شہر میں ایک کلو بریڈ کی قیمت دو ڈالر سے زائد رہی جب کہ پیٹرول کی فی لیٹر قیمت 1.26 ڈالر ہے۔ اس برس بخارسٹ میں وائن کی بوتل گیارہ ڈالر جب کہ بیس سگریٹوں کی قیمت ساڑھے چار ڈالر ہے۔
8۔ چنائی
بھارتی شہر چنائی بھی سستے ترین شہروں کی عالمی درجہ بندی میں آٹھویں نمبر پر ہے۔ نئی دہلی کے مقابلے میں چنائی میں بریڈ کی قیمت پندرہ سینٹ زیادہ ہے جب کہ وائن کی بوتل گیارہ ڈالر میں مل جاتی ہے۔ چنائی میں سگریٹ کی ڈبی کی قیمت بھی دہلی سے کم ہے۔
7۔ الجزائر شہر
شمالی افریقی ملک الجزائر کے دارالحکومت کا نام بھی الجزائر ہے جسے اس رپورٹ میں دنیا کا ساتواں سستا ترین شہر قرار دیا گیا ہے۔ الجزائر شہر میں بریڈ کی فی کلو قیمت دو ڈالر، وائن کی بوتل دس ڈالر جب کہ پیٹرول کی فی لیٹر قیمت صرف 0.28 ڈالر ہے۔
6۔ کراچی
پاکستانی شہر کراچی بھی سستے ترین شہروں کی اس عالمی درجہ بندی میں دنیا کا چھٹا سب سے سستا شہر قرار دیا گیا۔ گزشتہ بارہ ماہ کے دوران کراچی میں ایک کلو بریڈ کی اوسط قیمت 1.70 ڈالر، وائن کی بوتل چودہ ڈالر جب کہ سگریٹ کی ڈبی کی اوسط قیمت 1.68 ڈالر رہی۔ اس دوران فی لیٹر پیٹرول کی اوسط قیمت 0.63 ڈالر رہی۔
5۔ بنگلور
ٹاپ ٹین سستے ترین شہروں میں تیسرا بھارت سے تیسرا شہر بنگلور بھی شامل رہا جہاں فی کلو بریڈ کی قیمت 1.33 ڈالر اور وائن کی بوتل سولہ ڈالر رہی۔ اس برس بنگلور میں پیٹرول کی فی لیٹر قیمت نئی دہلی سے کچھ زیادہ ہے جب کہ سگریٹ کی ڈبی کی قیمت 3.94 ڈالر ہے جو کہ دہلی سے قریب ایک ڈالر کم ہے۔
4۔ لاگوس
نائجیریا کا شہر لاگوس سستے ترین شہروں کی ٹاپ ٹین فہرست میں شامل ہونے والا واحد افریقی شہر ہے جو اس عالمی درجہ بندی میں چوتھے نمبر پر رہا۔ لاگوس میں بریڈ کی فی کلو قیمت 1.16 ڈالر اور وائن کی بوتل بھی پونے سات ڈالر کی ہے۔ یہاں فی لیٹر پیٹرول کی اوسط قیمت چالیس سینٹ ہے اور سگریٹ کی ڈبی بھی سوا ڈالر کی ہے۔
3۔ الماتی
گزشتہ برسوں کے دوران قازقستان کا دارلحکومت الماتی دنیا بھر میں سستا ترین شہر تھا تاہم ملکی کرنسی کی قدر میں میں پچاس فیصد تک کمی کے باعث اس برس الماتی دنیا کا تیسرا سستا ترین شہر رہا۔ اس برس الماتی میں بریڈ کی فی کلو قیمت ایک ڈالر، سگریٹ کی ڈبی 1.26 ڈالر اور وائن کی بوتل ساڑھے سات ڈالر رہی جب کہ ایک لیٹر پیٹرول کی قیمت اکاون سینٹ رہی۔
2۔ کاراکس
سیاسی اور معاشی عدم استحکام کا شکار ہونے کے باجود اس برس وینزویلا کا دارالحکومت کاراکس دنیا کا دوسرا سب سے سستا شہر قرار پایا جس کی بڑی وجہ حکومت کی جانب سے معیشت کو مصنوعی طور پر سہارا دینے کی کوششیں ہیں۔ کاراکس میں فی لیٹر پیٹرول کی اوسط قیمت صرف ایک سینٹ یعنی 0.01 ڈالر ہے۔
1۔ دمشق
اس برس دنیا کا سستا ترین شہر خانہ جنگی کے شکار ملک شام کا دارالحکومت دمشق قرار پایا۔ دمشق میں ایک کلو بریڈ 0.60 ڈالر، وائن کی بوتل 3.35 ڈالر، سگریٹ کی ڈبی 1.55 ڈالر جب کہ پیٹرول کی فی لیٹر قیمت نصف ڈالر رہی۔ دی اکانومسٹ کے مطابق دنیا کا سستا ترین شہر ہونے کے باوجود دمشق کے رہائشی اس فرق کو اس وجہ سے محسوس نہیں کر پا رہے کیوں کہ سن 2017 میں شام میں افراط زر کی اوسط شرح اٹھائیس فیصد رہی تھی۔