بنڈس لیگا کا انتیسواں میچ ڈے شروع

انتیسویں میچ ڈے کے سلسلے میں ہفتے کے روز کل سات میچ کھیلے گئے۔ ان میچوں میں دفاعی چیمپئن ڈورٹمنڈ کا میچ بھی شامل تھا۔ یہ میچ وولفس برگ کے خلاف تھا جو اپنے کھیل میں توازن اور بہتری پیدا کرنے کی کوششوں میں ہے۔ بنڈس لیگا کی ٹاپ ٹیم نے وولفس برگ کی ٹیم کو ایک کے مقابلے میں تین گول سے ہرایا۔ اس جیت کے بعد ڈورٹمنڈ کے کل پوائنٹس 66 ہو گئے ہیں۔ میچ کے وقفے پر ڈورٹمنڈ کی ٹیم ایک گول سے آگے تھی اور اس نے دوسرے ہاف میں مزید دو گول کیے۔ وولفس برگ کی ٹیم نویں پوزیشن پر ہے۔ رواں سیزن کے ابتدائی میچ ڈیز کے دوران وولفس برگ تنزلی کی منزل پر تھی مگر اب اس نے کوچ میگاتھ فیلکس کی قیادت میں خود کو سنبھال لیا ہے۔

ہفتے کے روز کھیلے جانے والے ایک اور میچ میں فٹ بال کلب بائرن میونخ کی ٹیم نے آؤگُس بُرگ کی ٹیم کو ایک کے مقابلے میں دو گول سے ہرایا۔ یہ میچ وقفے تک ایک ایک گول سے برابر تھا۔ اس میچ میں کامیابی سے میونخ کے پوائنٹس 63 ہو گئے ہیں۔ بنڈس لیگا کے درجہ دوم سے پہلے مرحلے میں کھیلنے کا اعزاز حاصل کرنے والی آؤگُس بُرگ کی ٹیم اس وقت چودہویں مقام پر ہے۔ اسے بھی موسم خزاں کے بعد تنزلی کا خطرہ تھا لیکن یہ اس مشکل دور سے نکل آئی ہے۔

دفاعی چیمپئن ڈورٹمنڈ کو اپنی برتری برقرار رکھنے کے لیے اگلے تمام میچوں میں کامیابی حاصل کرنا ضروری ہے۔ کسی بھی شکست یا ہار کی صورت میں دوسرے مقام پر بیٹھی بائرن میونخ کی ٹیم آگے نکل جائے گی۔ بائرن میونخ اسی کوشش میں ہے کہ کسی ایک میچ میں دفاعی چیمپئن لڑکھڑائے تو وہ اس کا بھرپور فائدہ اٹھائے۔ دو تین ہفتے قبل تک ڈورٹمنڈ اور بائرن میونخ کے ٹوٹل پوائٹنس کے درمیان فرق پانچ کا تھا جو اب کم ہو کر تین رہ گیا ہے۔ دونوں ٹیمیں تیسویں میچ ڈے میں ایک دوسرے کے مدمقابل ہیں اور اس میچ کا فیصلہ ان کے چیمپئن بننے کا فیصلہ کر سکتا ہے۔ یہ اہم میچ گیارہ اپریل کو کھیلا جائے گا۔

ہفتے کے روز کھیلے گئے دیگر میچوں میں ہوفن ہائیم کلب نے کائزرزلاؤٹرن کو ہرایا۔ نیورمبرگ اور فرائی برگ کا میچ دو دو گول سے برابر رہا۔ دونوں ٹیمیں بارہویں اور تیرہویں پوزیشنوں پر براجمان ہیں۔ تنزلی کی مشکل میں گری کولون کی ٹیم اپنا میچ برابر ضرور کھیلی مگر اس کا کوئی بڑا فائدہ اسے حاصل نہیں ہو سکا ہے۔ اس وقت بنڈس لیگا کے پوائنٹس ٹیبل پر سب سے نیچے کولون، کائزرزلاؤٹرن اور ہیرتھا کی ٹیمیں ہیں۔ ایسا دکھائی دیتا ہے کہ اگلے سارے میچ جیت کر بھی کائزرزلاؤٹرن اور ہیرتھا تنزلی سے بچ نہیں سکتیں۔

بنڈس لیگا کا تیسواں میچ ڈے دس اور گیارہ اپریل کو کھیلا جا رہا ہے۔

ah/ng (AP, Reuters)