بائرن میونخ پہلی پوزیشن کے قریب

ہوفن ہائم کے خلاف شاندار فتح کے باوجود بائرن میونخ کے لیے نمبر وَن کا فاصلہ چار پوائنٹس سے زیادہ بھی ہو سکتا تھا۔ تاہم اسے پوائنٹس ٹیبل پر اس وقت اول نمبر کی ٹیم اور دفاعی چیمپئن ڈورٹمنڈ کے ہفتے ہی کو آؤگس برگ کے خلاف کھیلے گئے میچ کے بے نتیجہ رہنے کا فائدہ بھی ہوا۔

اس وجہ سے ڈورٹمنڈ اس ہفتے پہلی پوزیشن پر اپنی گرفت مزید مضبوط بنانے میں ناکام رہی۔ آؤگس برگ کے خلاف اس کا میچ بغیر کسی گول کے برابر رہا۔

یوں بائرن میونخ کے کھلاڑیوں کے لیے جیت کا مزہ دگنا ہو گیا ہے۔ ہوفن ہائم کے خلاف میچ میں ان کی طرف سے ماریو گومیز نے ہیٹ ٹرک کی۔ انہوں نے میچ کا پہلا گول کھیل کے پانچویں منٹ میں ہی داغ دیا تھا۔ پینتیسویں منٹ میں انہوں نے ایک اور گول کیا اور پھر اڑتالیسویں منٹ میں ایک اور!

یوں اس سیزن میں ماریو گومیز کی جانب سے اسکور کیے گئے مجموعی گول اکیس ہو گئے ہیں۔ بائرن کی جانب سے Arjen Robben نے دو گول کیے۔

دوسری جانب دفاعی چیمپئن ڈورٹمنڈ مسلسل انیس میچوں سے ناقابل شکست چلی آ رہی ہے۔ تاہم ہفتے کے میچ میں اس کے کھلاڑی پوائنٹس ٹیبل پر بہت نچلے درجے کی ٹیم کے خلاف کوئی بھی گول نہ کر سکے۔

ہفتے کے روز کھیلے گئے دیگر میچوں میں وولفس برگ نے لیورکوزن کو دو کے مقابلے میں تین گول سے مات دی۔ مائنز نے نیورمبرگ کو دو ایک سے ہرایا۔ مؤنشن گلاڈباخ اور فرائی برگ کا میچ صفر صفر سے برابر رہا۔ کولون نے ہیرتھا برلن کو ایک صفر سے شکست دی۔

اتوار کو موجودہ میچ ڈے کے آخری روز حسب معمول دو میچ کھیلے جائیں گے۔ پہلے میچ میں بریمن کا سامنا ہینوور سے ہوگا جبکہ دوسرے میچ میں شالکے کی ٹیم ہیمبرگ کے مدمقابل ہو گی۔

پوائنٹس ٹیبل کی صورت حال:

اس ہفتے ابھی تک پوائنٹس ٹیبل پر سرفہرست سے لے کر نویں پوزیشن تک کوئی فرق نہیں پڑا۔ ان پوزیشنوں پر بالترتیب ڈورٹمنڈ، بائرن میونخ، مؤنشن گلاڈباخ، شالکے، لیور کوزن، بریمن، ہینوور، شٹٹ گارٹ اور نیورمبرگ ہی ہیں۔

دسویں سے سولہویں پوزیشن تک تبدیلیاں ہوئی ہیں اور اب ان پر بالترتیب وولفس برگ، مائنز، ہوفن ہائم، کولون، ہیمبرگ، آؤگس برگ اور ہیرتھا برلن ہیں۔ فرائی برگ اور کائزرز لاؤٹرن کی ٹیمیں بدستور (بالترتیب) سترہویں اور اٹھارہویں نمبروں پر ہیں۔

رپورٹ: ندیم گِل

ادارت: مقبول ملک