Vajmari - Qyteti i vogël, por me shumë histori
Në Vajmar jetuan dhe punuan Gëte, Shiler dhe Gropius. Në Vajmar Republika e parë Gjermane nxori kushtetutën e saj, e po këtu janë vrarë edhe nejrëz në kampet e përqendrimit.
Në qendër të zonës historike
Sheshi qendror i tregut është një pikëtakimi për vendasit dhe turistët. Këtu ndodhet bashkia (djathtas) e ndërtuar në periudhën e Rilindjes Europiane dhe hoteli Elephant, të cilin si prej shumë kohësh edhe sot e preferojnë miqtë e famshëm të qytetit.
Sundimtarë të dhënë pas artit
Kështjella që nga mesi i shek. të 16-të ka qenë rezidencë e dukëve të Saksoni-Vajmarit. Në fund të shek. të 18-të dukët Carl-August dhe nëna e tij Anna Amalia e kthyen Vajmarin në një qendër të historisë së kulturës dhe krijimtarisë gjermane. Sot në kështjellë ndodhet koleksioni dukal i kulturës, pjesë e "Vajmarit Klasik" të përfshirë në listën e UNESCO-s për Trashëgiminë Botërore të Kulturës.
Teatri Kombëtar gjerman
Teatri Kombëtar Gjerman, që Gëte e ka drejtuar nga viti 1791 si teatrin dukal, është edhe pjesë e historisë politike: në 1919 këtu u mblodh Asambleja Kombëtare e Republikës së parë Gjermane. Sot Teatri Kombëtar dhe Opera e Vajmarit, ofrojnë shfaqje teatrore dhe koncerte që nga klasikja e deri tek veprat bashkëkohore.
Shtëpia e Gëtes
Poeti me perspektivë Johann Wolfgang Goethe erdhi në Vajmar në vitin 1775 me ftesë të dukës Carl-August. Duka i dha atij për të punuar e jetuar shtëpinë në kopësht në prakun anës lumit Ilm. Më vonë Gëte u vendos në shtëpinë me më shumë hapësirë në "Frauenplan", që sot është gjithashtu shtëpi muze.
Shtëpia e Shillerit
Meqënëse Gëte i ofroi atij një banesë dhe duka rrogë më të madhe edhe Friedrich Schiller në vitin 1799 u vendos në Vajmar. Në katin e dytë, në papafingo, shkrimtari krijoi ambjentin e tij të punës dhe të banimit, që sot janë muze. Duke nisur qysh nga "Virgjëresha e Orleanit" premierat e të gjitha dramavë të mëvonshme të Shilerit janë shfaqur në teatrin dukal.
Një mjedis i mrekullueshëm për klasikët
Biblioteka e dukeshës Anna Amalia me sallën e famshme në stilin rokoko në 2007 u rihap pas restaurimit prej dëmeve nga një zjarr i madh. Biblioteka ishte një ndër koleksionet e para të librave të një princi që hapej për publikun. Këtu kanë punuar Gëte dhe Shiler, ky i fundit ka qenë edhe drejtor i bibliotekës për shumë vite. Sot ajo është bibliotekë studimore me fokus letërsinë rreth viteve 1800.
Gropius dhe Bauhaus
Që nga viti 1996 ky institucion në Vajmar quhet "Universiteti Bauhaus". Ai u themelua në 1919 nga Walter Gropius, pasuesi i Henry van de Veldes si drejtor i "Shkollës së lartë të dukës së madh të Saksonisë për Artet Pamore". Arkitekti Gropius e rikonceptoi programin mësimor dhe e quajti shkollën "Staatliches Bauhaus". Këtu ai jepte mësim për harmonizimin mes artit dhe teknikës.
Nacionalsocializmi në Vajmar
Në Ettersberg pranë Vajmarit një monument përkujtimor tërheq vëmendjen për mizoritë e nazistëve. Në këtë territor që nga viti 1937 ndodhej kampi i përqendrimit Buchenwald. Ky ka qenë një ndër kampet më të mëdha në Gjermani. 56.000 vetë gjetën vdekjen në këtë kamp prej torturave, eksperimenteve mjekësore dhe nga stërmundimi.
Trashëgimi kulturore
Pas rënies së murit të Berlinit në 1999 Vajmari ishte i pari qytet nga ish-blloku lindor që u zgjodh kryeqytet i kulturës europiane. E për këtë kishte mjaft arsye: Çdo verë këtu zhvillohet festa e artit. Ky festival për artet bashkëkohore bashkon në një skenë letërsinë, muzikën, teatrin, baletin dhe artet pamore.