Rusia përdor një herë gjuhën e armëve dhe pastaj atë të bisedimeve
16 Gusht 2008Në shtypin gjerman vazhdon të diskutohet raporti me Rusisë dhe Perëndimit. Komentatorët paralajmërojnë se gjendemi ndoshta para rifillimit të një lufte tjetër të ftohtë.
Gazeta Offenbacher Post shkruan:
Moska nuk do të ngurrojë të veprojë në të njëjtën mënyrë si tani, kur të jetë fjala për të ruajtur sferën e ndikimit të saj. Presidenti i ri i vendit nuk lë pikë dyshimi për këtë. Atmosfera e akullt në Soçi, tonet e ashpra nga Uashingtoni dhe europianët që nuk dinë se ç'të bëjnë - papritur ndjehet sërish një lloj arome e luftës së ftohtë.
Kurse Thüringischer Allgemeine vëren:
Kremlini është i vendosur dhe ka përballë një perëndim që nuk di ç'të bëjë. Edhe pse kancelarja Merkel e përdori shpesh fjalën dialog në takimin me Medvedevin pala ruse qëndroi si granit. Integriteti territorial dhe sovraniteti i një vendi duket se nuk luajnë më rol tek Medvedevi dhe Putini, kur mendojnë se u kërcënohen interesat e tyre strategjike në Kaukaz. Në fillim përdoret gjuha e armëve pastaj fillojnë bisedimet. Polonia po mundohet të gjejë strehë tek sistemi amerikan i mbrojtjes ndaj raketave dhe nënshkroi edhe një pakt ndihme me SHBA-të. Marrëdhëniet e mira me Moskën që filluan të vihen re pas ndryshimit të qeverisë në Varshavë, i takojnë tani së kaluarës.
Heilbronner Stimme thekson edhe një herë rëndësinë e diplomacisë:
Diplomacia është tepër e rëndësishme, sepse përkrahësit e luftës së ftohtë kanë zënë sërish pozicionet. Po ashtu është fat që për momentin presidente e radhës e BE-së është Franca dhe në krye të saj Sarkozy, i cili është kritikuar mjaft. Mendo sikur presidencën e radhës ta kishte Polonia apo vendet baltike. Marrëveshja e tanishme e Varshavës me SHBA-të për sistemin e mbrojtjes ndaj raketave, nuk është e rastësishme dhe nga këndvështrimi mbarëevropian një konstelacion jo i mirë, i cili ia vështirësoi misionin kancelares.